صالح الحميرى يكتب … الفخاخ النفسيه .. الجزء الثاني

الفخ (11) التعاطى مرة واحدة فقط

بيشوف أنه قضى فترة كويسة فى التعافى وحقق انجازات ف لو جربها مرة مش هيخسر عشان هو عارف هيعمل ايه ، ضرباية واحدة مش هتخسر

محتاج يفهم أن الضرباية مرة واحدة زى التزحلق على الجليد ، المرة بتجر مرة وهيرجع لنفس الدايرة تانى

الفخ (12) كل المتعافين سوف ينتكسون

بيشوف مرض الادمان دا لعنه ، ومحدش بيتشفى منه ، ليه يتعب ويرجع ينتكس محتاج يفهم أن الانتكاس مبيحصلش فجأة ، فى تصرفات وسلوكيات بتحصل قبل الانتكاس ومحتاج اكون واعى بيها زى ما اتعلمتها ..

الفخ (13) مكافأة نفسى

بيشوف أنه تعب فى التعافى واستحمل كمية ضغوط ، ومش عايز تشجيع من حد ، هو عاوز يكافئ نفسه وبس .

محتاج يعرف أن التعافى خلاه يحس ويفهم ويكون انسان من غير مخدرات ودى أكبر مكافأة ممكن يتمناها .. وأنه لسه شايف الحلو فى المخدرات ، وفرصته الحقيقية هى أنه يكون قادر يحس بالفرحة من غير المخدرات ..

الفخ (14) سوف أتعاطى من أجل الجنس فقط

انا عايز اعمل علاقة بس انا عارف ان ادائى بالمخدرات بيكون أحسن وأطول وكمان بيخلينى اعرف اتعامل معاها واكلمها ، وانا مش عايز المخدرات انا عايزها عشان كدا بس ،،

محتاج افهم أن دا مبرر وإنكار فى مرضى عشان انتكس ، وفى الاخر هقع فى دائرة الادمان ..
وان الجنس بالنسبالي مش مجرد رغبة دا إدمان بديل عن مادتى الأساسية ،
ويفضل يشكل خطر على التعافى لحد ما تبقى عندى مهارة التعامل معاه ..

الفخ (15) الوصول للأهداف

بيدخل فى التعافى عشان أهله يحققوله اللى بيتمناه أو عشان عنده مشاكل قانونية أو مادية أو طلاق أو هينفصل من شغله ،يتعلم أنه بيتعافى عشان نفسه مش عشان حد ،
وخسارة فى الادمان كتيرة ، ولو أخد الموقف دا هيرجع لخسايرة تانى من اول وجديد

الفخ (16) التوقعات السلبية

شايف الحياه كلها فشل ، وكل المتعافين بينتكسوا حتى لو قضوا فترة تعافى كبيرة ، وكل حاجه ضاعت ، والناس هتفضل تحكم عليه ومفيش أمل لأى حاجة .

الشخص دا محتاج يعرف أن امبارح عدى وعمرة ما هيتكرر ، وبكرا ميعرفش عنه حاجة وأقصى حاجة يقدر يفكر فيها هى أنه يعيش لليوم فقط ويفهم أن دى كلها محاولات بتحسين بالعجز عشان يتعاطى ..

انا معرفش المستقبل مخبى اية ومينفعش أتوقعه ، بس هكمل حتى لو النهاردة يوم وحش

طب ازاى اتعامل مع الفخاخ دى ؟

– الدعاء
– المشاركة
– الملاحظة والمراقبة
– الاستبصار والتعلم
– عمل سجل الرغبة الملحة فى التعاطى
– الأمانة والالتزام بالبرنامج،..