ماجده حسين..تكتب.. بيت العيله

الناس كلها اليومين دول تسمع كلمه بيت العيله اول حاجه تفكر فيها المشاكل اللي بتحصل والكل يفكر الف مره لما يجي عريس لبنتهم والجواز هيكون في بيت عيله ليه بنشوف بس المشاكل طب بيت العيله مافهوش حاجه ايجابيه معقول

انا شايفه ان مش كل بيوت العيله يتخاف منها

زمان كانو بيقولوا علي الاصل دور

يعني الاصل ده ناس عندهم فلوس ولا ناس تعرف الاصول وتعرف الصح في التعامل مع بنات الناس وتراعي ربنا فيهم

مع الأسف في حموات اول ما تجوز ابنها تبقي فاكره مرات ابنها دي خدامه جايه ليها هي وولادها ولو عندها بنت تبقي خايفه عليها وديما تطلب من مرات ابنها انها تشتغل ومتقدرش ان مرات ابنها من حقها يبقي ليها حياتها الخاصه طبعا الصوره دي اغلبها في الأرياف وطبعا ده ظلم لزوجه الابن وسبب من المشاكل الكتير اللي بتحصل وتوصل احيانا للطلاق

ونجي نشوف صوره تانيه الام ابنها اتجوز بعيد عنها وانشغل بمراته وبيته واخواته زيه وابتدي كل واحد يشوف حياته ودخلو في نقطه البنت مسؤوله عن الام ولا الولد لان مرات الابن غير ملزمه والنتيجه بنشوفها كلنا في مواقع التواصل الإجتماعي عقوق الأبناء محدش بيسال عن الام والاب وقت الكبر وده ناتج عن الاستقلال والبعد عن بيت العيله وبعد المسافات بينهم وبين اهلهم هو بيكون شماعه يعلقوا فيها سبب بعدهم وعدم قدرتهم انهم يخلو بالهم منهم

لو كل اسره عندها إمكانية ان تعمل بيت ليها وفي نفس الوقت لولادها معاها يبقي جميل جدا لو اتعاملو بما يرضي الله مع زوجات ابنائهم وجميل جدا لو الزوجه دخلت البيت وفي نيتها انها تعامل اهل جوزها بحب كأنهم اهلها

وقتها الابن هبقي سند لابوه وامه والاخ سند لاخواته وهتبقي عيله جميله تتجمع مع بعض في قاعده حلوه وضحك من القلب ووقت الشده تلاقي في ترابط والكل بيقف جمب بعضه والكل شايل نفس الحمل والازمات تعدي بسهوله ويطلع الاولاد متعلقين بخالهم وبعمتهم وعمهم وفي ترابط عائلي وده من الحاجات الإيجابية

طب لو مافيش إمكانية أن أولادنا تبقي معانا في نفس البيت

برضوا لازم نعودهم انهم يبقي في وقت نتجمع فيه مع بعض

ياريت الناس كلها تتعامل بما يرضي الله بيت العيله مش كله وحش ومش كل الناس زي بعضها احنا بس محتاجين نختار ناس صح

ربنا يصلح حال الجميع يارب ويرزوق كل اب وام با أبناء يكونوا بارين بيهم