نصائح هامة من د. خالد حامد
أعملك كوباية شاي أخضر بالنعناع وتعالا، عندي لك حدوتة أوعدك هتفيدك وتفرق في حياتك وفهمك للي حواليك
طب عين شمس كلية صعبة وازعم إني عملت قدر استطاعتي علي مدار 7 سنوات علشان اخرج منها دكتور شاطر بتقدير أمتياز ثم ماجستير من نفس الجامعة بتقدير جيد جدا علي مدار 4 سنوات ،دة طبعا وانا بقضي جيشي كظابط احتياط علي مدار 3 سنوات، ثم تعيني في معهد القلب القومي كنائب قلب 4 سنوات ثم زمالة أمراض القلب ومازال البحث جاريا
رحلة طويلة كان فيها مواقف كتير لا تنسى، هقولكم منهم واحد بس فيه البهاريز كلها
بعد تعيني في معهد القلب بسنة تم ترشيحي لسفر لمستشفى شرم الشيخ الدولي كأخصائي أمراض القلب هناك لمدة شهر سنة 2016.
خارج من طحنة الجيش ومعهد القلب لشرم الشيخ حيث الطبيعة الجميلة والمناظر الخلابة
ماكدبش عليك ياصاحبي كان طالع عيني في المعهد نباتجيات واخر كل شهر تقبض 2500 جنية وممكن شوية خصومات كمان تأخير رغم اني بكون بايت في المستشفى!!!
ماعلينا، ادينا هنتفسح شوية والشغل في شرم هادي والدنيا جميلة، لكن بتكون مقيم في المستشفى يوميا والسكن واكلك وشربك داخل المستشفى ولك في اليوم خمسوميييييت جنية يعني في الشهر 15 أاااالف جنية، حلو هينفع علشان اتجوز البنت الجميلة اللي بحبها.
شرم الشيخ صغيرة ومافيهاش مستشفيات كتير ويعتبر شرم الدولي اهم مستشفى هناك وكنت أخصائي القلب الوحيد بالمستشفى واللي فوقي مدير المستشفى.
في يوم المدير كلمني وقالي شوف يا د.خالد في عيان إيطالي في الاستقبال عنده الم شديد في الصدر، دة راجل مهم وصاحب مجموعة فنادق LA VISTA فشوفه كدة الله يسترك يابني!
نزلت لقيت راجل كبير وشة هينط منه الدم من كتر الكحول ولابس شبشب وشورت وحوالية 5 بدل بودي جارد.
رغم انه شكله لا يدل على انه ملياردير وكمان جاي بشبشب بس كان عليه هيبة كدة ماتعرفش جاية منين ياجدع
شوفته وعملتله رسم القلب والانزيمات وبصيت عليه بالاكو واديته العلاجات الطارئة لذبحة الصدرية ( 4 اسبوسيد، 4 بلافكس، ولاصقة نيترودرم ، وكرستور) وطمنتهم ان الأمور مستقرة وهنحتاج نحجزه تحت الملاحظة للإطمئنان.
المساعد بتاعه طبعا كان معه على الخط طول الوقت دكتور إيطالي، فكل شوية يجي يقولي ممكن تعمله كذا اقوله عملته خلاص، ممكن تديله كذا اقوله خده خلاص!!!
فعلي مايبدو الدكتور اللي معه علي التليفون قاله خلاص الدكتور دة متخصص قلب وفاهم كويس خليك معه
فلقيت الرجل الكوبرة ابو شورت وشبشب جايلي بنفسه وبيقولي (جراتسيا جراتسيا) الكلمة دي كان بيقولها دايما الفنان سمير صبري لما يعمل ايطالي في الأفلام الابيض وأسود وراح مديني في أيدي ورقة لونها اخضر وفيها صفرين ، بس انا اتكسفت أبص علشان مؤدب
للحظة كدة حسيت المستشفى كلها بصالي، فضربت في نفوخي أغنية شادية “وماشفش الرجال السمر الشداد في وقت المحن، أصله ماعداش علي مصر ياحببتي يامصر يامصر)
ورحت مشوح بايدي كدة وقولتله
Nooooo this is my job, I take my Salary from the hospital, u r welcome.
والمساعد بتاعه يقولي دي حاجة بسيطة خدها يادكتور وانا اقول لااا ابدا، وال 5 بدل يقولولي خدها يادكتور خلاص وانا اقول لاااايمكن
وفعلا ماخدتهاش، وربنا لغاية النهاردة ماعارف انا ماخدتهاش لية ، دة ملياردير ايطالي وهيسافر بلده فماكنش له لازمة تحزق اوي يعني و NOOO وتفرج علينا المستشفى، شهم اوي انت، يومها بليل وانا نايم مسك في نفوخي أغنية الفنان العظيم طارق الشيخ (انا بتقطع من جوايا ونسيت طعم الفرح) !!!
كنت فين ياخويا وشادية مش عايزة تنزل من على وداني
بس الحمد لله كان المكسب ثقة المدير فيا فبقي كل يوم يكلمني للكشف علي احد الشخصيات الهامة، لدرجة اني وصلت لأكبر مسؤلين شرم بلا مبالغة، كل دة في شهر واحد فقط.
واكبر حد هناك كشفت عليه وكلمني إني اتعين او أمد 6 شهور وقولتله معلش لازم ارجع القاهرة لاستكمال دراسة الزمالة المصرية لأمراض القلب.
ورجعت من السفر دايب من الفراق، مشتاق للورق الأخضر، عرفت بعدها انها كانت 100 يورو بالصلى على النبى، يعني ما يعادل حاليا حوالي 1800 جنية، هتقولي بس دة كان 2016، هقولك لو كنت خدتها وربنا ماكنت هصرفها لحد دلوقتي ومش بعيد كنت اصورهالكم كمان
بس ياسيدي، وخدت my salary بقي من المستشفى أخر الشهر 15 الف جنية حتة واحدة
مشهد خارجي راكب جوباص وقاعد جنب الشباك سرحان في جبال الطريق للقاهرة اول مرة
يعني انا نفس البني آدم اللي بيتنفخ شغل في المعهد ليل نهار ودائما متهم بالتقصير وفي الاخر ملاليم، لما روحت مكان تاني تم تقديري علميا وماديا وادبيا كمان وكنت مرتاح نفسيا ومبسوط!!!
من بعدها ابتديت اشوف الدنيا بمنظور مختلف وأكره الموظفين والروتين، وبقيت اخد بالي من حاجات ماكنتش بقف عندها قبل كدة، أروح اعمل الاكو في المعهد ببلاش واحيانا نتشتم من الأهل في الاستقبال ولا يتم تقديرنا من أي جانب، بعدين اروح شفت المستشفى الخاص الراقية في الدقي يتحسبلي الشفت ب 1400 جنية واعمل الأكو ب 500 جنية ومنتهي الرقي في التعامل من الاهل والمستشفي، وسبحان الله انا نفس الشخص!!!
اذا الفكرة في انت حاطط نفسك فين، وشايف نفسك ازاي وبتحلم بأية، مش في اللي الناس عايزاك عليه…فاهمني يامحمود؟!!
احمد زويل في لقاء قالوله ليه ماقعدتش في مصر ؟
قالهم كان زماني مدرس كيمياء!!!
قيمتك انت اللي بتصنعها لنفسك بعد تعب وجهد وسهر، ايوة كل مكان اشتغلت فيه له فضل عليا ، لكن ماتستخسرش في نفسك الارتقاء والتطوير والبحث عن الأفضل لك ولأسرتك ولحياتك ومافيش حاجة اسمها أنتماء ببلاش وبدون تقدير، دة وهم يصنعه اصحاب النفوذ لسيطرة علي الضعفاء واستغلال طاقتهم.
شوف انت فين؟ ونقصك اية؟ وطور نفسك وأتعلم علشان تحط نفسك في المكان اللي بتحلم بيه وساعتها قيمتك هتبان…وماتنساش تبقى تاخد ال 100 يورو وانت ماشي
