د. خالد حامد يكتب … الضغط المرتفع مش لازم يعمل أعراض
أزاي تقنع شخص ضعطه 200/100 قسته له بالصدفة _ كان جاي يكشف علشان فسفوسة في صباع رجله الصغير _ إنه مريض ضغط ومحتاج علاج مدى الحياة
_ بعد كل صلاة جمعة .. كان شباب المنطقة يتجمعوا قدام البيت ونقعد نتكلم ،ولا تخلو المحادثة من الاستشارات الطبية المجانية الكثيرة، واللي صاحبه دكتور ياسعده ياهناه
من يومين قاعد في عيادتي وكشف دخل، فكانت بنت أحد جيراني ” اللي بشوفه بعد كل جمعة” ، فبقولها اهلا اتفضلي خير؟ قالتلي لا مش انا اللي هاكشف دة بابا
قولتلها طيب هو مجاش معاكي ليه؟! قالتلي لا ماهو جاي أهو…
الباب مفتوح وماحدش بيجي ، ببص لها وعايز أقولها مافيش حد بيدخل مستنيه إيه
مابقتش فاهم ، هو في إيه وبعد انتظار ثواني طووويلة.. ظهر جاري متعكزا وقد فقد الحركة بنصف جسمه الأيسر!!!
والله من الصدمة لثواني نسيت إني دكتور، قولتله إية دة ازاي حصل كدة، دة انت كنت كويس؟! ، وبعدين أسكت علشان أستوعب وابدأ أتعامل معه كمريض مش حد عارفه كويس!
قولتله انت كان عندك ضغط مرتفع ومش بتاخد له علاج؟!!
_قالي آه ، كنت باخد شوية وابطل شوية ومش بتابع الصراحة!
فأرجع تااني أنسى وأقوله>> غلطااان بكون قدامك واحنا طالعين ونازلين ماقولتليش ليه؟! حرام عليك كان لازم تقولي او تجيلي العيادة اشوفك ،وبعدين أفتكر إني دكتور واقوله معلش ان شاء الله كل حاجة ترجع زي الأول نظبط الضغط وجلسات علاج طبيعي وهتبقي تماما..
مشكلة كبيرة لما تعالج حد قريب منك، وكلما زادت درجة القرابة كلما تناسيت انك دكتور.. ربنا مايجعل حد في الموقف دة ابدا >>> أطباء شاطرين لما حد من أبائهم بيتعب بحاجة خطيرة يبدأ يتعامل كشخص لا يفقه في الطب شئ ويتصل يستنجد بأصحابه الدكاترة ويقولهم أعمل إيه؟! ويوقف زي اهل اي مريض يسئل أسئلة لا تمت لطب بصلة “هو هيبقي كويس، اعملوا اللي تشوفوه صح”
نرجع لجاري..ضغطه كان بيبقي عالي وهو مش بيحس بأي تعب وفعلا قدامي كانت صحته كويسه جدا.. بس لما يقس ضغطه يلاقيه عالي 160/90 واحيانا 180/100 فياخد علاج شوية من نفسه ومايقسش تاني ولو حس انه كويس يبطله..مصري اصيل يعني!
إلي ان ارتفع 200/100 وحدثت جلطة بالمخ ادت لضعف الحركة بالنصف الايسر، ساعتها بس هتعرف قيمة برشامة الضغط المنسية!
للاسف الدرس كان قاسي علينا جميعا.. ربنا يتم شفائه علي خير.. حالته وحركته في تحسن مستمر الحمد لله
_الضغط المرتفع مش لازم يعمل أعراض، قيس ضغطك ولو مرة واحدة كل 6 شهور
_ الضغط المرتفع لازم تظبطه مع دكتور قلب _سواء كان عامل أعراض أو لأ _ قبل مايوصل للمضاعفات علي المخ والقلب والكلي والعين
_من رحمة ربنا ان بعض الناس بيجيلها مع ارتفاع الضغط صداع ، او نزيف من الانف ، او تنميل بنصف الجسم ويفك كعلامات تحذرية انك تلحق نفسك وتكشف، فماطنش ياعم الجامد!
_ تعيش بصحتك وانت بتاخد قرص يوميا مدي الحياة، افضل من ان تفقد الحركة في عز شبابك مدي الحياة.
_الضغط المرتفع 90% منه وراثي وجينات، 10% بس اللي بيكون بسبب مرض اخر وغالبا بيكون اخطر من الضغط نفسه، فبعد الفحوصات لما اقولك الضغط وراثي ومالوش سبب، أحمد ربنا وبطل معلومات كريم زعبولة اللي بيقولك لازم تعرف سبب الضغط علشان تعالجه!!!
_ “الضغط المزمن” : هو ارتفاع دائم لضغط الدم يعني صبح وليل، ليل وصبح، صبح وليل، اروح الشغل عالي عالي عالي، ارجع البيت عالي عالي عالي .. هتيجي بقي تقولي انا ضغطي بيعلي لما بتعصب واتنرفز بس، هتعصب عليك علشان دة مش ضغط طالما بيرجع تاني طبيعي لما تكن كدة وتستهدى بالله، اقولك في الحالة دي بقي بالذاات ” أشرب كركدية”
.. لكن “الضغط المزمن” لو شربتله شفشق كركديه مش هتستفيد غير ان لون الكيكي هيبقي احمر وردي جميل 🌸
#دمتم_بصحة_وخير
عيادة د.خالد حامد لأمراض للقلب والقسطرة القلبية
مصر الجديدة : 01208142006
حدائق القبة. : 01060568564
