أتريد معرفة: آل (ميتافيرس Metaverse)!! وما هو معناها الحرفى

عادل شلبي 

إقرأ فالإنسان عدوا لما يجهله ..!
لو أنت لسه متعرفش الخبر اللي عامل صدى وتريند في أوساط التقنية في العالم كله دلوقتي، فخليني أقولك إن رئيس مجلس إدارة عملاق التواصل الإجتماعي فيسبوك، قرر إنه يغير إسم المنصة بتاعته لإسم جديد تمامًا!!
وكل ده يعتبر تمهيد لمستقبل صناعة الإنترنت في العالم اللي بتستثمر فيه فيسبوك بقوة، واللي هيتحول بالكامل في وقتٍ ما من المستقبل، لشبكة واقع إفتراضي ثلاثية الأبعاد كاملة بيعيش فيها الناس ويتواصلوا مع بعض كإنهم جوه برنامج كمبيوتر.. زي فيلم ماتريكس كده!!
طب أيه الموضوع ده بالضبط؟!.. تعالى أحكيلك
بص يا سيدي.. الموضوع كله بدأ لما يوم الإتنين اللي فات، شركة فيسبوك أعلنت توفير فرص عمل لأكثر من 10 آلاف مهندس من ذوي المهارات العالية في دول الاتحاد الأوروبي. وتحديدًا ألمانيا وفرنسا وإيطاليا وإسبانيا وبولندا وهولندا وأيرلندا..
طب ليه كل ده؟!.. هما شغالين على أيه بالضبط مستاهل العدد الخزعبلي ده من المهندسين، فوق الآلاف اللي معاهم بالفعل؟!
الإجابة يا صديقي هي الإبتكار والتطوير المذهل اللي بيتم التخطيط لصناعته دلوقتي، عشان يبقى مستقبل شبكة الإنترنت ومنصات التواصل الإجتماعي المعروفة لينا حاليًا..
حاجة اسمها ال (ميتافيرس Metaverse)!!
لو مش فاهم معنى الكلمة والمغزى اللي بترمي إليه، فخليني أقولك إنها متكونة من شقين.. الشق الأول اللي هو (ميتا Meta) ده في الأصل كلمة يونانية معناها (ما وراء Beyond) أو (بعد After).. والشق التاني اللي هو (فيرس Verse) ده اختصار لكلمة يونيفيرس Universe الإنجليزية، اللي هي معناها (الكون)..
يعني المعنى هنا حرفيًا من كلمة (ميتافيرس) هو (ما وراء الكون) أو (ما بعد الكون)..
بس التعريف الأساسي للكلمة لو جربت تدور عليه على جوجل، هيقولك إنه عبارة عن مساحة واقع إفتراضي، بيقدر فيه المستخدمين إنهم يتفاعلوا مع بعض من خلال بيئة تم تصميمها بالكمبيوتر!!
يعني كإنك عايش ف محاكاة بالضبط!!.. شفت نظارات الواقع الإفتراضي VR Goggles قبل كده؟!.. اللي بتلبسها على عينك وتلاقي نفسك جوه عالم تاني دي، كإنك اتنقلت لعالم الأحلام..
أهو هو ده بالضبط اللي نقصده هنا.. المشروع اللي بتشتغل عليه فيسبوك ده، هدفه هو إنه يصنع عالم افتراضي ثلاثي الأبعاد، يتم تخليقه بأجهزة كمبيوتر باستعمال برامج محاكاة واقعية.. والبعد الإفتراضي ثلاثي الأبعاد ده هنقدر إننا كبشر مستقبلًا نلبس النضارة بتاعت الواقع الافتراضي بتاعتنا، عشان ننتقل ليه، ونقابل بعض من خلال الفضاء السايبري Cyberspace.. ومش بس كده.. لأ ده احنا هنتفاعل مع بعص ونتواصل مع بعض ونتكلم ونشوف بعض بصورة ثلاثية الإبعاد، ونتمشى براحتنا من خلال الفضاء المعلوماتي ده، بدون ما نتحرك من على السرير أو الكرسي!!
لو الموضوع مديك Vibes من فيلم ماتريكس وبيفكرك بيه جامد، فأنت مش غلطان.. لإن الفكرة قريبة جدًا فعلًا من العالم اللي شفناه ف فيلم ماتريكس.. عالم عايش فيه ملايين ومليارات البشر وبيتفاعلوا مع بعض ويفكروا ويحلموا وياكلوا ويشربوا ويناموا، وهما كل ده مش عارفين أصلًا إنهم ف عالم افتراضي!!
تخيل إن ده المستقبل اللي بيتم التخطيط له، واللي هتشوفه بعيونك قريب جدًا لما يتعمل، وينطلق إنطلاقه ضخمة شبيهه بالبداية اللي بدأها فيسبوك نفسه كده، سنة 2004!!
ولو فاكر إن فيسبوك بس هي اللي شغالة على التقنية دي، فخليني أقولك إن الموضوع في الواقع أكبر من كده.. لإن في شركات ضخمة تانية، عابرة للقارات حرفيًا، شغالين على نسخهم الخاصة من الإنترنت المُعزز ده.. منهم مثلًا شركة مايكروسوفت Microsoft اللي بتستثمر بقوة في الموضوع ده، وعندها بردو آلاف المهندسين اللي بيشتغلوا على المشروع..
ده غير شركات ومنصات الألعاب الرقمية الضخمة اللي زي (إيبيك جيمز Epic Games) و (روبلوكس Roblox)، اللي بردو داخلين بقوة في المشروع.. والواقع إن بإعتراف (مارك زاكربيرج) مؤسس فيسبوك نفسه، المشروع ده صعب يتم انجازه من شركة واحدة.. ولازم يتم التعاون والتطوير فيه من خلال أكثر من شركة.. وهما بالفعل مستعدين للتعاون مع شركات تانية للوصول له!!
ولهذا السبب -عزيزي القاريء- ففي إشاعة شبه مؤكدة طلعت في شكل تسريبات من مصدر بداخل شركة فيسبوك نفسها، لموقع The Verge الشهير، قال فيها إن مارك زاكربيرج بيشتغل على مشروعات وتكنولوجيا مستقبلية طموحة و Futuristic للغاية، وعشان كده ف هو بيخطط لإنه يغير إسم شركة فيسبوك كلها، ويخلي فيسبوك مجرد منصة تحت إسم شركة تانية كبيرة، بتشرف على المنصات التابعة ليهم بالكامل..
ده اللينك بتاع التقرير الرسمي بتاع The Verge أهو لو عايز تشوفه:
https://www.theverge.com/…/facebook-change-company-name…
يعني معنى كده إن فيسبوك مش هيبقى إسم الشركة.. لأ فيسبوك هيبقى واحد من ضمن ممتلكات والمنصات اللي بتمتلكها الشركة الكبيرة دي، زيه زي واتساب وإنستاجرام، والمنتجات والنظارات بتاعت الواقع الإفتراضي اللي بيصمموها تحت إسم Occulus.. كل دول هيبقوا أجزاء من شركة واحدة كبيرة ليها إسم مختلف تمامًا!!
واحد هيسألني طب هو ليه بيعمل كده، وهقولك إن الإجابة بتكمن في إنه عايز الشركة بتاعته متبقاش معروفة بإنها شركة سوشيال ميديا فقط.. لأ هو عايز إنها تبقى شركة تقنية كبرى، تابع ليها أكبر شركات ومنصات تكنولوجية في العالم.. وبالتالي يبعد عن نفسه وعن شركته السمعة السيئة اللي بتحيط بموقع فيسبوك حاليًا بعد التسريبات اللي طلعتها الموظفة السابقة في الشركة (فرانسيس هاوجن) عن ممارسات فيسبوك الضارة للمستخدمين بتوعه، وقالتها كمان في إستجواب رسمي قدام الكونجرس من حوالي أسبوعين كده!!
يعني باختصار، عايز يبقى حاجة بيسموها (شركة تكتل) أو Conglomerate.. تكتل ضخم عابر للقارات، ومتغلغل في كل نواحي الحياة الإجتماعية!!
محدش لسه يعرف الإسم الجديد هيبقى أيه، والموضوع سر بيتم حراسته بضراوة شديدة، لحد ما مارك يعلن عن الموضوع رسميًا في مؤتمر Connect السنوي اللي هيتعمل يوم 28 أكتوبر اللي جاي ده.. بس في توقعات بإنه هيبقى Horizon.. وده علشان المنصة الجديدة من فيسبوك، اللي قلتلك إنها هتشتغل بإنترنت الواقع الإفتراضي قريب دي، هيبقى إسمها Horizon Worlds.. ده حسب آخر حاجة وصلولها يعني.. ممكن تتغير، بس لحد دلوقتي ده الإسم..
وكمان فيسبوك لسه من قريب كانت أعلنت عن أبلكيشن جديد للتواصل في قطاع الأعمال، إسمه Horizon Workplace.. حاجة زي برامج Zoom و Google Hangouts كده.. بس بتبقى جوه واقع افتراضي.. كإنك قاعد مع زمايلك في المكتب، بس في واقع إفتراضي!!.. هتلاقي صورة من جوه البرنامج تحت
وعلى ذكر جوجل، خليني أقولك إن فيسبوك مش أول شركة تعمل موضوع تغيير الإسم ده.. لأ هي في الواقع جوجل عملت الموضوع ده قبلها، لما غيرت إسم الشركة كله من Google، وخلته Alphabet.. وخلت محرك البحث جوجل نفسه مجرد براند تابع للشركة الكبيرة اللي هي Alphabet.. وده كان عشان جوجل كانت بالفعل دخلت في أبحاث وشركات تقنية جديدة بتعمل حاجات مختلفة وأكبر بكتير من مجرد محرك بحث.. زي مثلًا كونها بتصنع أنظمة تشغيل آندرويد Android للموبايلات، وبتعمل سيارات ذاتية القيادة وبتطور تقنيات ذكاء إصطناعي AI متقدمة، وغيرها كتير..
نفس الكلام بردو حصل مع سناب شات، لما غيروا إسمهم من Snap Chat لإسم جديد هو Snap Inc.. وبدأوا يقدموا نفسهم على أساس إنهم شركة متخصصة في الكاميرات لما قدموا لأول مرة النظارات اللي فيها كاميرا بتاعتهم سنة 2016..
كل ده بيوريك العالم متجه لفين دلوقتي، والراجل اللي اسمه مارك زاكربيرج ده بيفكر ازاي وبيستثمر ف أيه هو وغيره من مليارديرات التقنية، وبيخططوا لإنهم يغيروا شكل حياتك وحياتي وحياة أولادنا كلها إزاي في خلال السنين القادمة!!
تخيل أنت شكل العالم هيكون عامل ازاي في المستقبل، وقد أيه هيكون في عوالم افتراضية كاملة هتعيش فيها وتقابل فيها الناس زي الحياة الحقيقية بالضبط!!
عوالم كاملة أكبر وأوسع من العالم بتاعنا بما لا يقاس، هتقدر تطير وتبحر فيها بمجرد التفكير، وبلمسة زرار..
تفتكر مستقبل زي ده هيكون مذهل وهيخلي حياتنا أفضل وأكثر إبهارًا؟!.. ولا هيكون بداية لعصر جديد مرعب، من تحكم شركات التقنية العابرة للقارات بحياة البشر الإجتماعية كلها، وهيخلي شكل الكوكب مختلف تمامًا عن اللي نعرفه دلوقتي؟!
هل المستقبل هيبقى يوتوبيا مشرقة ومبهرة تغير حياتنا كلها للأحسن، ولا هيبقى ديستوبيا ظلامية أشبه بالكوابيس؟!
هسيبلك أنت التخيل والإجابة في الكومنتات تحت ولو الموضوع عجبك، كالعادة هفكرك إنك تعمل شير ومنشن لصحابك، وتحكيلهم عن المواضيع اللي بتقرأها هنا.. الشير بيعبر عن دعمك ليا وللمحتوى، وبيساهم فعلًا ف انتشاره لعدد أكبر من الناس.. ف متبخلش به لو شايف المجهود يستحق.
دي مصادر للموضوع يومك جميل
https://www.latimes.com/…/2021…/column-facebook-new-name
https://edition.cnn.com/…/facebook-name-change/index.html
https://www.deseret.com/…/facebook-new-name-change…