أحمد شحاته.. الطباعه بمقاس 100 سم تجعل التفاصيل غير واضحة تماما وتصبح جودتها غير مقبولة

قال أحمد شحاتة  مؤسس وشريك جاليرى سفير آرت للديكور  ، من وقت للتانى أكيد هنحتاج ننظف التابلوهات ونمسحها وده سؤال بيجيلنا كتير جدا. دايما الناس بتقلق من التنظيف بقطعة قماش مبللة عشان الألوان متتأثرش, لكن طباعة اللوحات الفنية تطورت جدا وبقى الطبيعي والعادي إنه ألوان التابلوهات متتأثرش تماما بتنظيف السطح بالماء الكثير حتى مش البسيط, فلازم تتأكد من النقطة دي وتسأل عن طبقات الحماية الإضافية على سطح التابلوهات

وأضاف شحاته ، ناس كتير بتلجأ في صناعة التابلوهات واللوحات لإنها تجيب صور من على الانترنت وتطبعها بحجم كبير, أحيانا الموضوع ده بيكون مناسب لكن بنسبة قليلة جدا..

ولازم الصورة تكون فعلا بحجم وجودة كبيرة جدا جدا, ده غير مشكلة إن معظم الصور ليها حقوق ملكية ومش معنى وجودها على الانترنت انه ممكن نطبعها ونستخدمها فى منتجاتنا, فلازم تتأكد إن التصميم اللى هيتم طباعته على التابلوه هو تصميم أصلى وقابل للطباعة بالمقاس المطلوب بجودة طباعة 300-DPI وده الرقم الى بيحدد عدد النقط لكل بوصة فى التصميم

عشان كده لازم تتأكد كويس جدا من جودة التصميم المستخدم وإلا هتشوف صورة حلوة جدا وهي صغيرة على شاشة الموبايل او الكمبيوتر و لما تتطبع بمقاس كبير زي 100 سم مثلا التفاصيل هتروح تماما وهتكون جودتها غير مقبولة