د. خالد حامد.. أمتي اكون محتاج اكشف قلب واعمل موجات صوتية علي القلب (الأكو)
1.مريض الضغط مرتفع_ الضغط السليم أقل من 140/90_ الأكو بيقدر يشوف مدي تأثير الضغط المرتفع علي عضلة القلب..ظهور تضخم بعضلة القلب يعني ان حضرتك محتاج تظبط ضغطك بشكل افضل لان التضخم بيحدث مع ارتفاع الضغط شهور طويلة بدون علاج فعال.
2.مدخن وعندك ضغط وسكر.. دة مثلث الرعب كأن جسمك بيلعب ماتش ضد ( صلاح وفرمينو وماني).. هتمسك صلاح ماني هيجيب جون، هتظبط ماني، فرمينو هيطحنك.. فالحل تمنع التدخين من التشكيلة.. وكفايه عليك تظبيط الضغط والسكر وتحلق عليهم كويس
3.اصل ابني يادكتور عنده تحليل الميكروب السبحي ASOT عالي وقالوا عنده حمي روماتزميه وبياخد حقنة البنسلين طويل المفعول
_ طيب كشف قلب قبل كدة او عمل أكو علي القلب؟؟
= لأ!!!
دة اكتر مريض محتاج يكشف قلب ويعمل أكو لتحديد هل هو مريض حمي روماتزميه فعلا ولا لأ !!!.. لان تحليل ASOT لا يعتمد عليه مفردا لتشخيص الحمي الروماتزمية وأكتر من نص أطفال مصر اللي بياخدوا الحقنة مش محتاجنها اساسا
4. ألام الصدر المتكررة وخصوصا مع المجهود.. شرايينك التاجية بتقولك ابوس ايدك روح اكشف ياشيخ..شرايينك التاجية هي رأس مال قلبك الحقيقي.. طول مالدم بيوصل للعضلة كويس انت عايش ملك.. الدم قل تلاقي بقي نهجان وألام صدر وذبحات صدرية وليلة كبيرة اوي سعادتك!
5. النهجان المستمر مع اقل مجهود.. النهجان من الاعراض الخطيرة اللي ممكن يكون من اسبابها ضعف عضلة القلب.. القلب هو ماتور الجسم اللي بيوصل الدم لجميع اجزاء الجسم بما فيهم عضلة القلب نفسها.. لو ضعفت هتحس ان جسمك اتحول من سرعة 100 حصان واحد ماشي بستر ربنا
6. تورم القدمين باستمرار ( يعني تحس ان الجزمة بتاعتك اضيقت عليك او الشبشب مضايقك وبيسيب علامة علي وش رجلك) .. ودي من الحاجات اللي معظم المرضى مش بياخدوا بالهم منها.. ان تورم القدم قد يكون بسبب مشكلة في القلب.. في حالة تورم القدمين لازم تعمل فحوصات علي 3 أعضاء مهمين ( عضلة القلب ووظائف الكلي والكبد).
7. تسارع ضربات القلب وخصوصا الذبذبات الأذينية..مهم جدا الاكو بجانب رسم القلب لان من اسبابها ضيق او ارتجاع صمامات القلب و قصورر الشرايين التاجية وضعف عضلة القلب واللي بيسهل جدا تشخيصهم بالأكو.
8. المرضي اللي مركبين دعامات بالقلب لازم متابعة لكفائة عضلة القلب والشرايين التاجية بشكل دوري كل سنة مع متابعة الضغط (اقل من 140/90) والسكر ( أقل من 200 عشوائي وأقل من 7.5 التراكمي) والكولسترول بالدم ( الكولسترول الضار اقل من 55).. كدة انت برنس
9.الأكو فحص مهم جدا وبسيط وبيساعد في التشخيص المبكر لأمراض القلب.. وميزته ان الطبيب اللي بيعمله هو دكتور قلب متخصص مش أشعة .. فبيكون صورة كاملة عن حالتك بالكشف مع رسم القلب و قياس الضغط والسكر والكولسترول والتاريخ المرضي.. ويقدر يوصل لتشخيص السليم لحالتك والعلاج المناسب في زيارة واحدة فقط…
