د. خالد حامد اخصائى القلب يكتب : ” الملخص المفيد للقلب الحديد “
_ الكركدية مشروب خادع، يوهمك انك بتعالج الضغط لغاية لما تكتشف الحقيقة بعد فوات الأوان!!
(عمرك شوفت مريض داخل الاستقبال بضغط مرتفع ونزيف في المخ الدكتور طلبله كوباية كركدية؟!) ، لية مصممين انه علاج؟!!، ولو كان علاج لية ضغطك مرتفع رغم انك بتشربه؟!
_ الاسبوسيد اللي مكتوب عليه حماية للقلب، نسيوا يكملوا باقي الجملة علشان العلبة ماكفتش!!!
(حماية للقلب لمرضى القلب مش لك انت ياحاج)
_ السمنة الصناعي وزيوت القلي مفيدة جداً لدكاترة القلب، علشان كدة ماتستغربش لما يطلع دكتور ينصح أنها مفيدة ، لانها حقيقي أفادته كتير وبقي مليونير من كذبة لذيذة والناس بتحب طعمها!!!
(السمن المهدرجة والزيوت النباتية أحد أهم الأسباب لأمراض القلب والشرايين)
_ بمر علي مريض مدخن شره محجوز في الرعاية بأرتشاح رئوي نتيجة جلطة حادة بالقلب، فبقوله خلاص مافيش تدخين تاني وكفاية عليك كدة !!!
( قالي ماهو الواحد مابيعرفش انه غلطان غير لما يدخل النار والملايكة تيجي تحاسبه )
_ فاكر وانا بروح المدرسة في ابتدائي كان في راجل كبير بشعر ابيض بيجري كل يوم الساعة 7 بشورت وفانلة في الطريق، تقريبا كنت بشوفه كل لما اصحي بدري لغاية ثانوي، بعدها مابقتش أشوفه علشان مابقتش اصحى بدري
(لو حد شاف الراجل دة يقوله انه عظيم وكلنا نفسنا نبقى زيه )
(قليل من المشي او الجري يوميا يضمن لك مش بس تبقي سليم جسديا لا وجنسيا كمان لأخر الزمان )
_ محافظ علي الضغط اقل من 140/90، محافظ علي سكرك التراكمي اقل من 7، محافظ علي اكلك بعيدا عن الدهون، محافظ علي القليل من الرياضة يوميا، مش بتدخن وتكره الدخان ، بتاخد وقت كافي من الراحة والنوم 6_8 ساعات يوميا، لا تصاحب النساء ولا تشاهد الافلام الإباحية، مش بتشرب حشيش، بتحافظ على وزنك، بتاكل اكل صحي ،وبتشرب ماية كتير… انت أكثر صحة من نصف شباب البلد بلا مبالغة!!!
بس هيبقي السؤال بتعمل ايه في حياتك لو انت انسان جميل ومحافظ علي كل دة
هجاوب : دة اسمه life style modifications يعني تظبيط نمط الحياة والاستغناء عن العادات السلبية هتبقي في حتة تانية في قمة الرقي والتحضر ويفتح الله عليك أبواب الرزق ويعطيك هيبة وقبول بين الناس … بالكلمتين دول بس!!!
(سهل تكون انسان صحتك كويسة وحياتك جميلة ).. أما الاختيارات الصعبة فهي دائما بكامل إرادتك.
جمعيات القلب العالمية لم توصي بزيت الذرة او غيره كزيت صحي أبدا علي القلب ، ودة لعدة أسباب
أثناء عملية التصنيع والتكرير من الذرة، بيفقد الفيتامينات والمعادن المفيدة للجسم بشكل كبير
يحتوي علي اوميجا 6 له فائدة ولكن بيساعد علي حدوث الالتهابات وله أثار ضاره علي القلب في حالة عدم معادلة ب اوميجا 3 النافع جدا للقلب !!! اوميجا 3 النافع دة تقريبا مش موجود في زيت الذرة
الجسم السليم بيحتاج تكون النسبة بين الاوميجا 3 : الاميجا 6 _ 1: 4
في حين ان النسبة في زيت الذرة اوميجا 3 : اوميجا 6 _
1 : 46 .. يعني ضرره علي الجسم اكتر بكتير جدا من نفعه وبالتالي بيسبب امراض القلب والألتهابات وزيادة الوزن والاكتئاب وبيقلل القدرات الذهنية.. مانت واخد اوميجا 6 بالعبيط بقي وفرحان بيها في الإعلانات !!!
جمعيات القلب العالمية لم توصي بكرستال او غيره.. وإنما حديثا بيوصي بكلام مش هيعجب شركات السمنة الصناعي والزيوت المهدرجة ومحبي الإعلانات
_ السمنة البلدي والزبدة الطبيعي المستخلصة من ألبان الأبقار لانه بتعلي نسبة الكوليسترول النافع بالدم وبتقلل جدا الكولسترول الضار فبالتالي لها فوائد كبيرة علي شرايين القلب والمخ وبتحسن مناعة الجسم والقدرات الذهنية ( بشرط عدم الأفراط في إستخدامه لتجنب السمنة لإحتوائه على سعرات حرارية عالية)
_ زيت الزيتون Extra Virgin Olive Oil.. يستخدم بدون قلي علي السلطة او الجبنة او الفول مفيد جدا وصحي
_ واذا كان طاسة القلي لابد منها يبقي زيت جوز الهند الأفضل والأقل ضرر، او استخدام الزيوت النباتية في اضيق الحدود، حاولوا تتجنبوا طاسة القلية قدر الإمكان…
اللي يمشي ورا الإعلانات.. مايخلاش بيته من أمراض القلب !
