حبة وجع
عنتر اغا
قرب تعالى يا جدع
مين يشتري حبة وجع
حبة وشوش حبة رتوش
حبة رجال تطلع فاشوش
وكله على مرآى وخدع
قرب تعالى يا جدع
واللي قالي ممعاهوش
ومتعودتش مديهوش
كاني اي أخ لقيته فخ
ولما إحتجته ملقيتوش
وتعت شوف صاحبي زمان
ومش هقولك كان وكان
وأنا اللي صُنت وهو خان
وأنا كنت هضرب الودع
قرب تعالى يا جدع
وتعالى شوف إخوات كتير
وللآمانة مفيش ضمير
سيدنا يوسف عاش ف بير
وكتر اخواته ما شفع
قرب تعالى يا جدع
وتعالى للي عق أبوه
وطرد أمه عشان مراته
واللي وأكل حق اخوه
وكان بيحلف بحياته
قرب وخد كله ببلاش
أنا كله دافع تمنه كاااااش
أنا مت من جُبنه وعاش
ف بحر مليان بالخدع
قرب تعالى يا جدع
مين يشتري حبة وجع
