يا ساكنين الحر
نهى حمزه
يا ساكنين الحر
جاهزين فى عز الطل
ليلكم هو الظل
رسمتكم حروف ف كتابى
ومن حر صحرا وجوف الشرد
بأقول يارب شوية برد
بانده عليكم وباستنى جوابى
وأنا واقفه على اعتابى
أبدر ورق م الورد
أشم فيه ريحكم يا أعز الجند
تخبط دقات قلبى على أبوابى
يمكن فى دقه
يجينى منكم رد
وأخرج من التعبد فى مساماتى
كل الأماكن فى وادينا تشتهيكم
يا نور الحياه يا سمر الجباه
يا وجعنا المنتصر وإحنا على قيد الحياه
يا عشب اخضر مالى طريقنا
يا مغزانا فى وقت المناجاه
يا أنين الحجر
وإنتظار حبة مصر
يا عيونا فى كل إتجاه
يا ورد الخزامى .. يا عطر الكرامه
يا نفحه من ربى فى كل صلاه
إنتوا دعوتنا اللى لمتنا
يا زرعتنا ونور بيتنا
حلم الغلابه وضمة الشقيان
حاضنين سلاحكم
ولا ينال من زنادكم خسيس عميان
يا ساكنين الحر
ثابتين على الرمضاء لا كر ولا فر
حالفين تعاندوا الشر
يا إما يبقى خير يا إما يدوق المر
يا توأم الأفراح والأوجاع
باستنى يجينى الرد
أنا والوطن صابرين لأبعد حد
واللى يقولنا سد هنقوله سد يا بابا سد
إحنا جنود الله وأبابيل وقت الجد
