أبعد عن هؤلاء الأشخاص وسوف أضمن لك حياه سعيده

كتب: محمد دويدار

الكثير منا يعيش مكتوف الأيدي لايستطيع النهوض بسبب مشاكل كثيرة ومتنوعة منها المشاك المادية الثقافية العائلية أو حتي الإجتماعية وهم الأغلب ولا يجد من يحيط به وينحاز بجانبة ليس ليواسية بل ليشعره بأنه ليس وحده ولكن لا يجد منا أحيانا ذلك الحد؛ وتذكر دائماً أنك معك الله ولا تيأس أبدآ ومن هنا جائت قوانين الحياة الهادفة ألا وهي.

القانون الاول ابعد عن اللى طبعه مش طبعك وإللي مالوش اصل و لا كبير عشان متصغرش نفسك.
القانون الثاني ابعد عن الناس القاسية و حط تحت كلمة قاسية ١٠٠ خط اللي مالهمش عزيز ولا غالي.
القانون الثالث ابعد عن الكدابين بتوع الحوارات و اللى بوشين عمرهم ما هيكونو مخلصين الإخلاص فعل خفى لا رقيب عليه الا الضمير.
القانون الرابع ابعد عن اللى هونت عليه هونت مرة هاتهون عليه الف مرة.
القانون الخامس ابعد عن الشكاك و النكدى و إللى ضميره اسود ، بيبقى من وحاشه اللى جواه مفكر كل الناس زيه
القانون السادس ابعد عن بخيل المشاعر الانانى ، هيستكتر عليك اى كلمه حلوة تجبر خاطرك
القانون السابع ابعد عن اللى شايف غلطته صغيره أو شايف نفسه مابيغلطش، انت مش ناقص مرضى نفسين ف حياتك
القانون الثامن ابعد عن اللى تجبر بخاطره وتراضيه وتقربله ، وهو يفضل مكانه
القانون التاسع ابعد عن اللى تسامحه مره واتنين ويكرر غلطه، بيبقى فاكر نفسه أذكى منك وانك مابتحسش
القانون العاشر ابعد عن اللى ف شدتك عمرك ما لاقيته
القانون الحادي عشر ابعد عن اللى مابيحترمش ولا يكبر للكبير، هيبقى شايف نفسه شبح وبيعمل الصح وهو قليل الادب والأخلاق و عمره ماشاف تربيه
القانون الثاني عشر ابعد عن اللى يصغرك قدام الناس
القانون الثالث عشر ابعد عن الكهين ابو دمعه الممثل هيجبلك الهم
القانون الرابع عشر وآخرا ابعد ما تبصش وراك تانى صدقني اللى هيخسرك مش هيعوضك تانى.

ابعد من غير ما تعاتب , العتاب اتعمل للناس المحترمه الراقيه اللى أخلاقهم عاليه و اللى انت لسه باقي عليهم؛ خليك باقي على اللى باقى عليك؛ انك تنسحب من حياة الناس قليله الأصل دي مش نداله لا دي منتهي القوه والجدعنه مع نفسك
قرب لولاد الأصول اللى تقربلهم خطوه يقربولك الف وإللى قعدتهم مش هم و نكد اللى مبيعرفوش يجيبو سيره حد ولو اتكلمو على حد يتكلمو ف الخير اللى لو ماكلمتهوش يكلمك هو يسأل عليك قرب للشبعان القنوع اللى عارف يعنى ايه كبير ميرفعش عينه عليه و يعني ايه مبادئ وأخلاق .