د/ شيماء سليمان..تكتب..المر بيمر

مين فينا ممرش بأزمة أو اتعرض لصدمة أو فقد عزيز عليه أو خسر وظيفة أو فشل في تحقيق هدف بسببه دخل في حالة من الحزن واليأس والإحباط والإكتئاب !!!!!

عارف حقيقة الحالة اللي انت فيها دلوقتي ما هى إلا لحظة مؤقتة يعني مش دايمة حتمر زي ما أي حاجة بتمر في حياتنا ، زي الفرح ، الحزن ، الصعب ، السهل ، الوجع والألم كله بيمر .

ليه بقى حضرتك تحبس نفسك في سجن انت اللي بنيت جدرانه بمشاعرك السلبية ؟؟

كن على يقين إنها فترة وحتعدي ،،،

أيوة حتاخد من طاقتك وحماسك وشغفك ، أيوة حتسرق منك راحة بالك وحلاوة ابتسامتك وضحتك ، بس قصاد اللي حتاخده منك حتديك حاجات تانية كتير زي زيادة خبرتك الحياتية وقوة شخصيتك ، حتمرنك عالصبر و حتعرفك على نعم موجودة في حياتك مكنتش شايفها ولا عارف قيمتها ، الحالة دي حتكسر روتين حياتك وتساعدك في إعادة ترتيب أولوياتك وأهدافك ، حتدفعك لتنظيم خططك المستقبلية بصورة أدق وأكتر فاعلية .

شايف المر بيخرج من جواه حلو إزاي !!!

دلوقتي كل اللي مطلوب منك إنك تكسر جدران سجنك وتتحرر وتفتش على الحلو اللي جوا مرك ؛؛؛؛

ودايماً أفتكر :

” إن لا فرح بيدوم ولا حزن بيدوم “