د/ شيماء سليمان..تكتب..ليه بنتغير؟

ليه بنتغيّر؟

بقلم د/ شيماء سليمان

السؤال ده بنتسألة كتير وبنسأله لنفسنا أكتر!!! ليه اتغيرنا ؟ الحقيقة التغيير ده وراه دوافع وأهمها المواقف والظروف الصعبة والخبطات والصدمات اللي بنمر بيها خلال رحلة حياتنا و بسببها بنتوجع ونتأذى ؛ بس بعد فترة من تعرضنا للمواقف دي وتأقلمنا مع وجعها بنبتدي نستوعب ونفهم ونحلل كل حاجة حصلت معانا وتتحول لدروس نتعلم ونستفاد منها ونقوى بيها وإحنا بنكمل اللي باقي من رحلتنا في الحياة ؛ وساعتها حتحس بالاختلاف والتغيير في كل شيئ !! رؤيتك ونظرتك للأمور حتختلف ، ترتيب الأشخاص وأولوياتك حتختلف ، تمسكك وتخليك موازينهم حتختلف .

حتلاقي نفسك زي المهندس ماشي بمسطرتك وقلمك واستيكتك اللي حتمحي بيها كل شيئ مش مناسب ليك كل حاجة حتكون عندك بمقاييس و معاييربتحكمها الدقة والحرص معايير لوقتك وجهدك وأهدافك حتى مشاعرك .

عارف الشقلبة اللي حصلت في حياتك وخليتك تعيد تفكيرك في كل حاجة ماهي إلا نقطة تحول لحياة أفضل، بداية لتحقيق أهداف وأحلام مكنتش في حساباتك في يوم من الأيام .

اعتقد إنه آن الأوان إنك تشكر المواقف والظروف اللي إنت مريت بيها !! لولاها مكنتش حتقدر على التغيير اللي إنت عليه دلوقتي .

شكراً للمواقف

بسببك إحنا اتغيرنا