كيفية استخدام ملح الليمون فى التنظيف

مرفت العربى 

ملح الليمون

الكيلو بحوالى 12 جنيه من اى عطار

استخداماته :

1- لو عندك تى كاتيل استانلس ستيل بتعمل طبقه جير ابيض كده وساعات قشور بيضا من جوه

ملعقتين صغيرين ملح ليمون ومع نص كوب ميه وشغلى الغلايه بعد ما تغلى سيبيها شويه تبرد وتتنقع وبعدين اغسليها بالصابون العادى

حتلاقيها بتبرق زى الجديده

2- وعيون البوتاجاز لو نقعتيها من بليل فى ميه فيها ملح لمون وكربوناتو وشويه صغيره ديتول وشويه كلور الصبح بالسلك على خفيف حتلاقى العيون جديده نوفى

3- الحنفيات بتاعه المطبخ والحمام لو غسلتيها بملح لمون حتكون بتبرق زى الجواهر بالظبط مراياااا

4- مسحوق الاتوماتيك اعملى جردل مخصوص للغسيل الابيض

هاتى السايب واشترى نص كيلو ملح لمون

واضيفها على المسحوق واقلبيهم على بعض

اولا مفيد جدا للغساله لانه بيمنع التكلس اللى بيحصل من المسحوق العادى وكمان بيخلى الابيض روعه واستخدمى كميه اقل لان ملح الليمون بيبيض وينضف اكتر من لو بتستخدمى المسحوق لوحده للغسيل الأبيض

5- لو عندك سيراميك فى المطبخ او الحمام سواء فى الارض او فى الحيطه حوالين الشفاط مع الوقت حواليه الجبس الابيض الجميل ده بيتحول للون الاسود وبيبقى السيراميك نضيف لكن حواليه اسود

عشان تخليه زى الجديد وكانه سيراميك متركب لسه حالا دلوقتى حتغلى ميه على اد المساحه فى الارض اللى حتنضفيها وتحطى فيها نص كوب ملح ليمون وشويه ديتول وشويه كلور وبالمكنسه الناشفه او فرشه بلاط بايد طويله المهم تكون خشنه او فرشاه اسنان قديمه لو تقدرى تجيبى كرسى حمام وتقعدى عليه وبفرشاه الاسنان الميه المغليه مع ملح الليمون حترجع لك السيراميك حواليه ابيض زى الياسمين وكانك حالا مركباه ولسه الصنايعى ماشى دلوقتى بعد التركيب حتذهلى من النتيجه وبعدها بشويه داونى او اى صابون فيه رائحه زكيه بتمسحى مسحه كمان وممكن لو جلانس الزجاج تدى تلميعه للسيراميك فى الاخر اتفرجى على الروعه والريحه وتوفير الصابون وكمان نضافه ولمعان وبريق مريح للنفسيه وانشرح فى المكان كله

بعد كده مش بتحتاجى غير مره كل فتره لو الجبس الابيض رجع يسود تانى

و عشان التوفير لو عندك الغلايه وبتغسليها بملح الليمون بانك بتغلى الميه جواها قبل ما تبرد بترشيها على الارض فى الحته اللى اسودت بس وبفرشاه البلاط او فرشاه الاسنان بتعمليها بدال ما تحضرى ميه مخصوص يبقى يوم تنضيف الغلايه بتنضفى الارض