الممثل الشاب أبراهيم الزيادي في حوار خاص لـــــ نبض الوطن
خالد حمودة
عندما يوجد الإصرار والعمل يوجد النجاح
هذا هو الشعار الذي سار عليه أبن محافظة الدقهلية الممثل الشاب ابراهيم الزيادي ، نجمٌ تزين في سماء في عالم المسرح والتمثيل حتى صار لمعان بريقه يشعُ في كل ارجاء الوطن العربي
هنا توقفنا مع احد الوجوه المشرقة اللامعة في سماء المسرح والتمثيل … وكان لنا محطة مع الممثل والفنان الشاب ابراهيم الزيادي
* ممكن تعرفنا عن نفسك ؟
انا إبراهيم الزيادى طالب بالمعهد العالى للفنون المسرحية قسم التمثيل و الاخراج ٢٣ سنة من المنصورة محافظة الدقهلية
* كيف كانت بداية دخولك في علم التمثيل والمسرح ؟
البداية كانت فى مسرح الجامعة فى المنصورة اول ما دخلت الجامعة ناس شافوني و دونى المسرح و عملت اول مسرحية ليا وكان اسمها ” ثورة الموتى ” ، و بعدين حبيت اللعبة و لقيت نفسى بتطور جدا ، قريت كتير جدا عشان افهم اللى بعمله كويس ،
وعملت بعدها مسرحية تانية كان اسمها مسرحية “حارة النسيان” ،
يليها مسرحية اسمها ” المايسترو ” كل دا كان تطوير ليا ، لحد ما اخدت جايزة مركز أول تمثيل على مستوى جامعة المنصوره عن عرض ” المحبرة دور الصديق ” و بعدها خدت جايزة تميز عن مسرحية ” زقاق المدق ” دور فرج ، واللجنة اوصت بإنى لازم اروح اقدم فى المعهد العالى للفنون المسرحية .
* ما هي اصعب فتره في مشوارك الفني حتي الآن ؟
اصعب فترة بالنسبة ليا كانت بعد ما سافرت الي القاهرة و قدمت في المعهد العالي للفنون المسرحية و الفترة دى كانت صعبة جداً بس الحمدلله اتقبلت و ساعتها مكنتش مصدق لان بيتقدم فوق ٢٠٠٠ واحد و بيقبلو ٢٥ بس ، جالي اتصال من صديق ليا وبلغني انى اتقبلت فى المعهد ، طبعاً فرحت جداً و كنت لازم ادور على مكان استقر فيه فى القاهرة، والحمدلله عملت كدا و بقيت طالب فى المعهد العالى للفنون المسرحية و من هنا بدأ عالم الاحتراف بالنسبة ليا .
* ما هي الأعمال الذي شاركت بها منذ بداية مشوارك ؟
أول حاجة عملتها على مسرح المعهد مسرحية اسمها ” الضباب ” , كنت بقدم دور راجل أعمال المسرحية كانت من اخراج محمد ذكى ، والحقيقة المسرحية دي كانت وش السعد و فتحة الخير عليا، لأن بعد تقديم الدور الناس و الدكاترة اتبسطت جداً من الأداء .
ثاني عمل ليا كانت مسرحية “صوت بلا صدى ” قدمت فيها دور سعيد الابن وكانت برده على مسرح المعهد .
بعد كده عملت مسرحية ” الأستاذ كلينوڤ ” قدمت من خلالها دور ڤيدال على مسرح المعهد ، والحمد الله طلعت من اوائل الدفعة فى نفس السنة
بعدين لقيت اتصال من المخرج الكبير مازن الغرباوي من اهم مخرجين مصر و قالى محتاجك معايا فى دور فى مسرحية ” هاملت بالمقلوب ” و طبعاً دى كانت فرصه كبيرة اوى ، الحمدلله عملت عرض ” هاملت بالمقلوب ” قدمت من خلالها دور هوراشيو و الحمدلله الفيدياك كان كويس جداً
وعملت اول عمل ليا على التلفزيون مسلسل ” الحلم ” من اخراج حسنى صالح ، قدمت من خلالة دور ” عبدالله ” ، و كانت فرصة مهمه وعظيمة .
بعد كدة شاركت في تقديم اعلان المبادرة على التلفزيون المصري من اخراج استاذ / هانى كامل
بعدين ظهرت من خلال ” برنامج الدوم ” بعد ترشيح المعهد ليا بالمشاركة في البرنامج اللي بالنسبة ليا كانت فرصه مهمه وصعبة ولكن بفضل الله كبار مخرجين و ممثلين مصر قالولى كلام كبير اوى زى المخرج والمؤلف الكبير تامر محسن – والمخرج مروان حامد والفنان الكبير عمرو يوسف والفنانة يسرا والفنانة ليلى علوى ، كل النجوم دي الحمد الله قالت في حقي كلام كويس جدا ودا كان دافع كبير ليا اني اكمل المشوار .
بعد الانتهاء من برنامج الدوم عملت مسلسل” حى الجمالية ” دور شوقى للمخرج الكبير محمود عبد الكافى اللي تم إذاعته في رمضان 2022 ، دا و كان دور كبير جدا ومهم بالنسبالي
بعدها اترشحت من عميد المعهد لبطولة مسرحية فى مسرح الدولة من اخراج محمود حسن وكان اسم المسرحية ” الجميلة و الوحش ” اللي قدمت فيها دور الأمير الوحش و كانت خطوة كبيرة جدا ليا وبفضل وتوفيق من الله قدرت الفت انتباه كبير و اراء الناس كلها كانت ايجابية الحمدلله .
وبعد كده قدمت مسرحية ” هاملت بالمقلوب ” اترشحت لعرضها فى تونس فى مهرجان ايام قرطاچ المسرحية و الحمدلله سافرنا و عملنا عرض الناس اتبسطت منه هناك جداً
* هل في أعمال فنية تشارك بها الآن ؟
حالياً احنا لسه مخلصين مسرحية ” البطة البرية ” ودي من اهم و اصعب المسرحيات اللى عملتها .
* ممكن تتكلم معانا اكتر عن تفاصيل مسرحية ” البطة البرية ” ؟
مسرحية ” البطة البرية ” من اخراج الدكتور هنادى عبدالخالق ، مسرحية نرويجية للكاتب هنريك ابسن
المسرحية بتتكلم ان جريجرش ڤيرله ، الذي يضطر لقول الحقيقة بأي ثمن، يكشف لعائلة إكدال بعض المعلومات غير المطلوبة حول ماضي كل فرد من أفراد الأسرة. المعرفة تدمر أوهامهم وحياتهم الأسرية. كآخر عمل مدمر، تقتل هيفديج، ابنة يالمر إكدال المراهقة، نفسها بعد أن أبلغ جريجرش ڤيرله الأسرة بأنها قد تكون الابنة غير الشرعية لرجل آخر غير والدها الحبيب.
دورى فيها كان جريجرش ڤيرله و كانت شخصية متعبة جداً، شخص مثالى صادق بينفر من تصرفات والده اللى دايماً غلط ، عايش على مرتبة فقط دون مساعدة والده رغم انه اغنى واحد فى البلد،
شخصية خدت منى مجهود كبير و اثرت على نفسيتى و تعبتنى جداً بس الحمدلله طلعت بأفضل شكل و الجمهور اتبسط جداً .
هل قمت بتقديم اعمال خارج مصر ؟
قدمت مسرحية ” هاملت بالمقلوب ” فى تونس مهرجان ايام قرطاچ المسرحية ،
ومسلسل ” حى الجمالية ” كان يتم عرضة فى السعودية و هو انتاج سعودى
* من هو الفنان الكبير الذي أثر في شخصيته ابراهيم الزيادي ؟
الحقيقة انا متأثر بالفنان احمد مكى جداً بحبه و نفسى امثل معاه و بحب الفنان يحيى الفخرانى و الفنان محمود عبدالعزيز و الفنان ماجد الكدواني و من الشباب بحب محمد فراج جداً .
* هل هنشوفك في أعمال فنية قريبا ؟
ان شاء احنا حاليا بنحضر لمسرحية جديدة فى مسرح الدولة و بدأ اول التحضيرات و بإذن الله هتبقى خطوة مهمه ، و اعلان كبير مع فنان كبير هينزل فى رمضان
