شيماء سليمان.. تكتب.. كيفيه التعامل مع المراهقين
من فضلك يا دكتور أنا ولادي داخلين على مرحلة المراهقة ومحتاجة أعرف إزاي أتعامل معاهم علشان أعديها بسلام ؟؟؟
أنا مبسوطة جداً من حضرتك لإن ده يدل على إن بقى عندنا الوعي الكافي لأهمية الإسنعانة بالمختصين في أمور حساسة جداً بالنسبة لنا ولولادنا زي مرحلة المراهقة اللي بتعتبر هي بداية لبناء مستقبل مشرق .
تعالي بس قبل ماقولك تتعاملي إزاي ؟؟؟ محتاجة أكلمك عن المراهقة ، أنماطها عاملة إزاي ، سماتها ، علشان لما نفهم حنقدر ساعتها نتعامل بوعي أكتر وبطريقة أبسط وأقل أخطاء وبالتالي حتمر بسلام ……
تعالي نعرف يعني إيه مراهقة ؟؟؟
هى العمر الفاصل بين الطفولة والرشد وبتختلف بداية المراهقة ونهايتها من شخص للتاني ومن مجتمع لآخر وده بيرجع لعدة عوامل زي الجنس ، الظروف والبيئة المحيطة بالمراهق وفي المرحلة دي بيحصل تغييرات بيولوجية بسبب البلوغ ونبتدي نلاحظ مظاهر للنمو الجسمي ، العقلي و الإجتماعي ….
ودلوقتي حنتعرف على أنماط المراهقة لإن مينفعش نحدد نوع المراهقة من خلال أخلاقيات المراهق اللي أصلا أغلبها بتعود إلى تربيته …
المراهقة المعتدلة :
بيكون هادي ، مستقر عاطفياً و مش متوتر ، متزن ، علاقاته طيبة ، عنده استقرار نفسي .
المراهقة المنطوية :
تلاقيه مكتئب ، منعزل ، سلبي ، خجول ، معندوش ثقة بنفسه ، بيتصرف بشكل متناقض ” يقول الحاجة ويعمل عكسها ” .
المراهقة المتمردة :
دايماً ثائر عدواني وبيكون عدوان مباشر في صورة “إيذاء ” أو غير مباشر في صورة ” عناد ” ، عايز يثبت نفسه وبيتمرد على أي سلطة تقابله.
المراهقة المنحرفة:
ودي بتعتبر خليط من المراهقة المتمردة والمنطوية ولكن نسخة متطرفة، الانحلال الأخلاقي عنوانها ومككن يدفع لإرتكاب الجرائم .
يلا نتعرف على كتالوجنا اللي حيعلمنا فن التعامل مع أولادنا قرة أعيننا في مرحلة المراهقة…..
*دورنا كأهل إننا دايماً نكون متابعين لأمور ومشاكل المراهقة وإيجاد طرق مناسبة للتعامل معاهم ومع مشاكلهم علشان منخسرهمش .
*بما ان في تغيرات جسمية بسبب البلوغ وده حيخلي عند المراهقين قلق من التغيرات المفاجئة دي ودورنا إننا نطمنهم بحوارنا معاهم عن سن البلوغ والتغيرات الطبيعية المصاحبة ليه .
*لما يكون غضبان بلاش نتناقش معاه لإنه ساعتها مش حيستقبل أي نصيحة وده غصب عنه مش قلة أدب .
*لازم يكون عنده خصوصية وأرجوكم بلاش التطفل دي متطلبات مهمة عندهم .
*نصاحبهم ونخليهم يشوفوا إننا مهتمين بإهتمامتهم وان هدفنا راحتهم وسعادتهم ودي الحقيقة إحنا مش بيكدب عليهم .
*دايما نساعدهم في إشغال وقت فراغهم بطريقة تدفعهم للتقدم .
*نساعده انه يحس باستقلاله ، ممكن نديله مصروف أسبوعي ، أو نعتمد عليه في القيام ببعض الواجبات الأسرية .
*خليكم مرحبين بأصدقائهم لإنهم جانب مهم وفعال ومؤثر بالنسبة لأولادنا .
*التحلي بالصبر ثم الصبر ثم الصبرثم الصبر من هنا لحد لما نعدي المرحلة دي على خير ربنا يعينا جميعاً .
*عايزين نبقى متوازنين وإحنا بنمنح الحرية لولادنا يعني بلاش نفتحها على البحري وكمان بلاش نخنقهم ونحبس أنفاسهم .
*حنتفق معاهم على مكافآت وكمان عقوبات بس من غير قسوة أو إحراج حتكون عبارة عن سحب امتيازات وده لو إحنا عايزين فعلاً نحسن من سلوكياتهم .
*نخلي بينا حوار وبلاش الأوامر والنواهي في الطالعة والنازلة.
*الحزم مطلوب ولكن بدون عند وقسوة.
في النهاية عايزين كأمهات وآباء نكون مدركين إن مرحلة المراهقة أهم وأخطر الفترات في حياة الإنسان محتاجة الكتير من الإهتمام ومزيد من الحرص والحذر في التعامل معاها فهي حصادنا للماضي فمينفعش نبقى أهملنا تربيتهم في الطفولة ونيجي بقى إحنا بكل تزمر نلومهم ونأنب في ضمايرهم .
“أي خلل في مراهقتهم هو تقصيرمنا في طفولتهم ”
مع الأخذ في الاعتبار إن لكل قاعدة شواذ
