د. شيماء سليمان تكتب …الصحة النفسية لأولادنا وعلاقتها بالتحصيل الدراسي لديهم
شكل الموضوع المرة دي صعب يا دكتورتنا !!!
لا صعب ولا حاجة
زي ما الصحة الجسدية لأولادنا هى إن يكون أجسامهم خالية من الأمراض كمان الصحة النفسية انهم يكونوا مش بيعانوا من اضطرابات نفسية زي الخوف ، القلق ، التوتر وغيرهم ، و زي ما شوية سخونية ممكن تخلي ولادنا ميقدروش يروحوا مدرستهم و تحصيلهم الدراسي يقل ويتأثر هوبالظبط اللي بيحصل لو ابنك متوتر أو خايف من شئ معين في المدرسة حتنعدم عنده الرغبة في انه يروح المدرسة ولو راح حتفضل مشاعر القلق والتوتر والخوف عنده ويمكن تزيد كمان والنتيجة حتكون انخفاض مستوى التحصيل الدراسي ليه ، فزي ما بنهتم بصحة أولادنا الجسدية لازم كمان نهتم بصحتهم النفسية
وإزاي يا دكتور نهتم بصحتهم النفسية ؟؟؟
قبل ما أقولك إزاي عايزة أعرفك على شعارك مع أولادك من هنا ورايح ، الشعار ده هو اللي حيخلي ولادك تتمتع بدرجة عالية من الصحة النفسية
شعار إيه يا هو إحنا داخلين إنتخابات ؟؟؟
عارفة بنقول ايه لما النهاية بتكون حلوة ؟؟؟
آه ” ختامها مسك “
شاطرة إحنا بقى حنزود ” بدايتها مسك ” وحيبقى
” بدايتها مسك وختامها مسك “
تعالي بقى أقولك إزاي تبتديها وتختميها مسك مع ولادك
ولادك ابتدوا يومهم ازاي حتأثر على باقي اليوم بالسب أو الإيجاب ، فبلاش نصحيهم من النوم بصوت عالي ونقعد نصرخ علشان يصحوا المشكلة دي مش حتلاقيها لو ولادك واخدين القدر الكافي من النوم .
خلي ولادك يسمعوا دعواتك ليهم وهما نازلين للمدرسة حيشحنهم بطاقة إيجابية رهيبة وينشط احساسهم بالتفاؤل ويحفزهم ليوم دراسي موفق.
التنظيم عامل أساسي لزيادة التحصيل الدراسي ساعديهم في وضع جدول زمني لإنجاز المهام الدراسية وتنظيم وقت للراحة وتناول الوجبات والرياضة والهواية …..
وجباتهم تكون صحية ومفيدة ومتكاملة العناصر الغذائية وركزي على الأكل اللي بيساعد على التركيز زي المكسرات والأطعمة الغنية بالألياف .
خصصي مكان هادي ونضيف ومرتب يحفز الولاد على المذاكرة .
وقت رجوع ولادنا من المدرسة نستقبلهم بحضن مليان بالحب ، والله الحضن ده ليه مفعول السحر خاصة في الحالات النفسية السيئة .
الرياضة والهواية مش في الصيف وبس لأ إطلاقا دول طول السنة والعمر كمان حتقوليلي مش حيبقى عندهم وقت حقولك ما هو ده اللي إحنا عايزينه إنتي عايزة يبقى عندهم وقت فراغ ليه علشان يمسكوا التليفونات ونرجع نشتكي ، الدراسة بريئة من حرمنا لأولادنا من رياضتهم وهواياتهم اللي بيحبوها .
بلاش نقارن ولادنا بحد .
ازرعي الثقة في ولادك علشان يقدروا يواجهوا لو اتعرضوا لنوع من التنمر .
بلاش أسلوب الإهانة والتوبيخ .
تقبلي الخطأ والفشل منهم وأكدي على إن الفشل ده فشل تجربة والاجتهاد أكتر حيدينا نتيجة أفضل .
اتبعي أسلوب التحفيز والمكافأة فعال جدا مع الدراسة ونتايجها .
دايماً شجعيهم وادعميهم .
افهمي مخاوفهم وتناقشي معاهم فيها متسيبيهمش يعيشوا معاها لوحدهم .
خلاص يومنا خلص وحنام …
طيب ازاي حنختمها مسك مع ولادنا ؟؟؟!!!
ولادنا في بداية نومهم بيكون نومهم خفيف يعني يقدروا يسمعونا ، قربي من ودنهم وبصوت هادي وحنين خليهم يسمعوا أد إيه إنتي بتحبيهم وفخورة بيهم واختميها ببوسة على جبينهم وكده يبقى ختامها مسك .
صدقيني لو أهتميتي بالتفاصيل دي ولادك حيتمتعوا بقدر عالي من الصحة النفسية والجسدية اللي حتأهلهم لزيادة التحصيل الدراسي وكمان يقدروا يستمتعوا بحياتهم بصورة أفضل .
وفي نهاية كلامي عايزة أقول لكل أب وأم كلنا بنتمنى ولادنا يحققوا نتايج وانجازات عظيمة ومبهرة في دراستهم بس المفروض نسأل نفسنا إحنا وفرنالهم المناخ الأسري المناسب اللي كله حب واحترام وعطاء وتضحية وخالي من المشاحنات والأنانية ويلا نفسي ؟ طيب قدمنالهم العوامل اللي تساعدهم على تحقيق طموحتنا فيهم ؟
لو الإجابة ” آه ” يبقى أبشروا
ولو الإجابة ” لأ ” يبقى متلوموش إلا نفسكم
