د. خالد حامد … أكتر مريض ممكن يحزنني كدكتور قلب .. مريض جلطة الشرايين التاجية

حسام النعماني

زي مافي لحظات مبهجة كتير في حياتنا كأطباء قلب بنقوى بها علي العلم والمثابرة ، في لحظات تانية بتخلي الواحد مهموم ويكاد يكون عايز يقوم يروح ومايشوفش عيانين تاني بعدها

عندنا في امراض القلب لحظات فارقة.. قبلها بساعات المريض بيكون زي الفل وصحته تمام وبعدها بساعات_ لو متلاحقش بالتشخيص والعلاج الصحيح _ يتحول لمريض مزمن بضعف عضلة القلب ومضاعفاتها من نهجان مع اقل مجهود وتورم بالجسم وضيق التنفس وغيره .. اللحظة دي هي “جلطة الشرايين التاجية للقلب”

خلينا نفهم الموضوع ببساطة.. رسم القلب اللي في الصورة لمريض حس في يوم بضيق نفس ونهجان وسرعة بضربات القلب وجسمة بقي يعرق جامد والوجع استمر معه ساعات.. جري علي احد الأطباء ” الغير متخصصين بالقلب ” وعمل رسم قلب وكانت علامات حدوث جلطة بالقلب واضحة وصريحة وقتها ولكن للاسف لم يتم تشخيصها وخد علاج اي كلام ورجع البيت

جالي العيادة بعدها بشهر وقد حدث ضعف شديد بعضلة القلب أثر الجلطة بأهم شريان تاجي مغذي للقلب.. كان من الممكن تتلحق بالقسطرة ودعامة انقاذ حياه وقتها ولكن للاسف ” فات الميعاد” حدثت الجلطة وفقد جزء كبير من كفاءة عضلة القلب.

ضعف العضلة هي المرحلة الأصعب اللي بتحاول تقنع فيها مريض كان سليم ان حياته لن تعود كما كانت! .. وان كان الحمد الله في تطور كل يوم في علاجات القلب ولكن يظل فكرة الرجوع للحالة الصحية كما كانت قبل الجلطة مستحيل إلا لو كانت أتلحقت في ساعتها بالقسطرة القلبية والدعامة لفتح الشريان التاجي المسدود بالجلطة.. لان خلايا عضلة القلب _ زي خلايا المخ كدة _ إذا ماتت وحدث بها تليف لايمكن ان تتجدد مرة أخرى وإلا كنا عيشنا للأبد .. فالعلاج السريع لجلطة القلب مهم جدا جدا جدا جدا

بيكون دورنا لو ملحقناش الجلطة وحصل ضعف بعضلة القلب الحفاظ بقوة علي ماتبقي سليم من العضلة علشان تؤدي وظيفتها في ضخ الدم من الرئة لباقي الجسم بشكل طبيعي ومنع تكرار الأزمة.. وبيرجع المريض يمارس حياته بشكل طبيعي ولكن

_ يتجنب المجهود الزائد.. فقط مسموح بالمجهود العادي
_ يمتنع عن التدخين تماما بكل انواعه
_ الاهتمام جدا بعلاج الضغط والسكر والكولسترول المرتفع وادوية السيولة حسب وصف طبيب القلب
_تحافظ علي نفسك من ادوار البرد، مش ناقصه كورونا ياعم!
_الامتناع عن الملح الزائد في الأكل ولا مخلل بقي ولا جبنة رومي وبلاها الفسيخ والرنجة
_الامتناع عن المسكنات زي البروفين والفولتارين والكتافست ، ويسمح فقط بالبنادول والبرسيتامول
_وأهم نصيحة لما تحس بوجع في الصدر مستمر او ضيق تنفس شديد أكشف اولا مع دكتور قلب متخصص في امراض القلب ” مش صدر ومش باطنة ومش جراحة”.. دكتور قلب…

” الفتوي في الطب حرام شرعا “.. لو سمحت بطل فتي