سلسلة حكاوي الكسيب
كتب فتحي المصري
تعالوا احكيلكوا على درس وتجربة مهمة جداً.
سنه ٢٠١٤ قررت اني افتح مشروع اسمه بايكولوجي وهو عباره عن معرض درجات ناريه على اعلى مستوى في واحد من ارقى الأماكن في القاهرة ، كان معروف عن معارض الموتسيكلات انها بتفتح في اماكن غير ظاهره لتوفير الإيجار والأعتماد على ان العميل هيدور عليا وهيوصلي ولذلك لم ارى اي معارض كبرى في مناطق راقيه وعلى شوارع حيويه. لذلك قررت اني اقوم بعمل براند قوي وسافرت امريكا وقعدت شهور اشتري افضل الموتسيكلات واحدثها لأقدمها للسوق المصري ولعشاق الدراجات الناريه. واشتريت اغلى واجود الأنواع وكان عندي قناعه تامه ان هيكون ليها العميل اللي هيقدرها . وفعلاً بدأ المشروع وفتح المعرض وبدأ العملاء في شراء احدث واجمل موتسيكلات في العالم اللي كانوا موجودين في المعرض ومن ضمن تلك العملاء مشاهير كثيرين وفنانين وحسيت ان اختياري فعلاً كان في محله وثقتي في نفسي زادت جداً وبدأ البيع كونتينر وراء كونتينر وعدد ضخم من الموتسيكلات وبدأ الطلب على صيانه تلك الموتسيكلات فقررت اني افتح مركز صيانه على احدث مستوى وسافرت ايطاليا وجبت احدث معدات لصيانه تلك الموتسيكلات وفتحت مكان على اعلى مستوى من الرفاهيه. وبدأنا فعلاً في تقديم خدمه الصيانه لعملاء بايكولوجي وعدت سنه والتانيه والنجاح عمالي يزيد ويكبر ومره واحده هوب. “التعويم” حدث وانخفضت قيمه الجنية ٣ اضعاف ومره واحدة هوب قرار بمنع استيراد الموتسيكلات وهوب ممنوع شراء الدولارات من البنوك غير السلع الأساسيه ، وهوب مفيش قطع غيار موتسيكلات وهوب مفيش صيانه وهوب حدود في التحويل للنقد الأجنبي والمصري ومرة واحدة كل شيء بقى ظلام حالك بالنسبه لي ولمشروعي الذي لم يتوقف عن النمو والنجاح لعامين متتاليين . قررت ساعتها في لحظة اني لن استطيع مواكبه تلك الظروف ولن استطيع ان استمر في هذا المشروع في مصر ويجب علي ان استسلم للأمر الواقع ان دوام الحال من المحال. وبعد التعويم ب٣ اشهر اغلقت المعرض ومركز الصيانه وخرجت من السوق المصري . ولم أيأس ولم استسلم وذلك لأني لم اخطأ او اقصر في شيء . ولكن هي اراده الله عز وجل . ثم بدأت في رحلة نقل المشروع الى دبي واستمر العمل في دبي تقريباً ٣ سنوات ثم حدث الركود الشديد سنه ٢٠١٩ في دبي ثم الكورونا وحدث سرقات شديده في المشروع وقررت ايضاً التخارج من هناك والمحافظه على ما تبقى من اصول والأستعداد لرحلة جديدة ربنا العالم هتبدأ امتى وفين.
حبيت اشاركوا تجربه عدم نجاح لا اراديه علشان تعرفوا ان الحياة مش على طول بتديلك سعات كتير بتاخد منك وتضعك امام مطبات شديدة ولكن من الحنكة عدم الإستسلام والأستمرار للأمام .
#الكسيب
