مرفت العربى..تكتب..حوارى مع طفلي

اسمعي يا ست ماما وركزى علشان ما نتعبش مع بعض

اولا

أول ما بتولد ممكن أقعد إسبوعين تلاته هادي و نايم … مطلوب من حضرتك تصحيني بأي وسيلة و ترضعيني لإن سُكري ممكن ينزل و دا خطر على حياتي في المرحلة دي بعد الشر عليا

ثانيا

بعد الأسابيع الأولى هتلاقيني بصرخ و أعيط و هلم عليكي الخلق … معلش تستحمليني الفترة دي أنا لسه جديد و مش متعود على الضوء و الأصوات و درجات الحراره المتغيرة و اللمس و الهدوم … كل دا جديد عليا و باخد وقت لغاية ما إتعود يمكن أول ٣ و ٤ شهور و علشان كده هتلاقيني نضيف و راضع و فُلة بس ٱسف مش هبطل صريخ و ما عليكي غير الصبر يا أمي

post

لو هترضعيني طبيعي إعملي حسابك إن الرضاعة حسب الطلب مش شرط كل ساعتين و من فضلك تهتمي بالنظافة الشخصية مش بحب ريحة العرق و ريحة الأكل اللي لازق في الهدوم و كمان مش بحب ريحة البرفانات النفاذة علشان حاسة الشم عندي قوية جداً و الحاجات دي بتخليني مقريف طول الرضاعة ف ياريت تراعي دا ارجوكي

و كمان لو ناوية ترضعيني طبيعي كفاية فنجان قهوة أو مج نسكافيه في اليوم علشان الحاجات دي بتنزللي في اللبن و بتعصبني … و ياريت تبعدي عن التوابل الحارة و أي حاجه مشهور عنها إنها بتعمل غازات زي الكرنب و القرنبيط و البروكلي لإن كل دا هاييجي على دماغك في الٱخر

لو هترضعيني صناعي نظمي رضعاتي كل ساعتين تلاته على الأقل أول ٣ شهور بعد كده عند الطلب و الرضعة تتعمل بماء مغلي و متبرد و تتقدملي دافيه و لو بحبها بارده مفيش مشكله و الباقي من الرضعه يترمى فورا يا امي و ما تديهوليش تاني لإنه بيبقى إتلوث خلاص من بقايا لعابي ⁦

و ما تنسيش بعد كل رضعة أو رضعة و رضعة تجيبي قطنة مبلولة ماء دافئ و تمسحي تحت دقني و رقبتي من فوق و تحت إبطي و تنشفي الاماكن دي بعد كده بقطنة ناشفه علشان ما تتفاجئيش بالإلتهابات و تسلخات منظرها وحش بالذات لو كنت مكلبظ شوية

كمان هدومي من فضلك تغسليها بمواد رائحتها مش نفاذة علشان زي ما قلتلك حاسة الشم عندي قوية و الروائح القوية سواء حلوة أو وحشة بتؤذي جيوبي الأنفية و بتخليني مش قادر أشم رائحتك اللي متعود عليها و بتحسسني بالأمان و دا بيؤدي بالتالي إلى القريفة و الصراخ المتواصل و كله برده هاييجي على دماغك في الٱخر …

و من فضلك ما تسيبيش البامبرز مليان فترة طويلة على جلدي علشان التسلخات و إغسليلي بماء دافئ كويس و لو سمحتي بلاش أي نوع من أنواع بودرة التلك ذراتها بتدخل في أنفي و ممكن تسبب لي حساسية في الصدر على المدى الطويل … إستخدمي كريمات الأطفال .. و لو هتستخدمي زيت جونسون إستخدميه على جلدي و هو مبلول بلاش على الجلد الناشف لإنه هاينشفه أكتر

فهمتي و الا أعصرك أطلع منك أمهات صغيره

زر الذهاب إلى الأعلى