الوصفة السحرية لتخلص من ضيق الشرايين التاجية
حسام النعماني
هتجيب فصين توم تعصر عليهم ليمونة، تاخد القشرة تفردها وتحطها في قلب بصلة، وتاخد قلب البصلة تزرعها داخل قلب خسة، قلب الخساية دة بقى تاكله عادي، ودي تعتبر زراعة قلب بديل جراحة القلب المفتوح
اعمل كدة كل يوم علي الريق، ولما يجيلك جلطة أجري علي المستشفى علطول موت؟!!.. أني آسف
والله ياجماعة بسمع من الهجايص دي كل يوم، وخصوصا لمرضى القلب اللي محتاجين قسطرة ودعامات او جراحة قلب مفتوح!!!
بمجرد مايسمعوا جراحة قلب يبدأوا يكتبوا على جوجل (تسليك الشرايين التاجية بدون قسطرة او جراحة)
فيطلع لهم كل النصابين بوصفات خزعبلية ليس لها أي اساس علمي ولا حتي مش علمي!!!
كلام لا يرتقي حتي انه يبقى هجايص، خرف ودجل!
اه يمكن بعضهم مش هيضر لان كلها وصفات أعشاب أو بصل وتوم أو مكملات غذائية زي اللي في الصورة ومريض محتاج جراحة قلب بيسئلني عليه كبديل للجراحة؟!
لكن بلا شك هتمنع المريض من البحث عن طريقة العلاج الصحيحة اللي تساعد في شفائه بإذن الله، بالإضافة إن تأخره في العلاج قد يسبب له مضاعفات خطيرة!!!
ماعرفش لية كتير من الناس بقى مابيفهمش غير كلام المهرجانات؟!! طيب خد ياسيدي الوصفة السحرية بطريقة الهجايص >>>
هترمي السيجارة اللي في ايدك يا سلطان،
وتبطل أكل حلويات وتقيس سكرك يابو السلاطين،
بلاش أكل الشارع وخف زيوت وأملاح وخد علاج الضغط يا معلم سلطااان
ماتبصلنا كدة ع الكولسترول نشوفه وصل وبيزغرط ولا لسة ياسيد المعلمين هأو أو أو آااو
الوقايه، الوقايه، الوقاية، دة حضرتك قبل مرحلة حدوث المرض وبعده كمان ولغاية لما نموت كلنا ونرجع لربنا…
لكن طالما وصلت انك “مريض” ومحتاج “علاج” يبقي العلاج ،العلاج ،العلاج (قسطرة ودعامات او جراحة حسب الافضل لحالتك)، والوقاية بردو شغالة معاك يابو السلاطين…
