معلومات مهمة جدا علشان الكحك ينجح معاكي .
شهد ياسر رفاعى
1-اهم سبب لدوبان الكحك ونعومته
كمية السائل المضاف بمعنى انك بتعملى مقدار الدقيق وتحطى نص المقدار سمن وبالرغم من ذلك بيطلع ناشف
علشان لازم تستخدمي دقيق مخصص للكحك والبسكوت يعني دقيق عرقه ضعيف نسبة البروتين تكون من 7ل9%
وده موجود عند محلات مستلزمات الحلواني وهيفرق معاكي جدا في النتيجة النهائية.
2=لو عايزة كحك نفس كحك المحلات يبقي تعملي الكحك على البارد كل المحلات بتعمل الكحك على البارد.بتسقعي السمنة كويس جدا وتضربيها مع السكر الناعم كويس جدا.
ونستخدم بيكنج بودر كيس لكل كيلو وممكن 10جرام من الخميرة لو عايزة تحصلي على كحك مفرغ
3– قصة بقى اعجن بمية ولا حليب
الميه افضل بس هتحصلي علي كحك دايب وناعم أما لو حابه كحك ناعم بس متماسك اكتر وفيه سنة خرفشه يبقي استخدمي حليب ودا هيكون مناسب اكتر للي بيشتغلوا علشان تضمني يوصل سليم للعميل .
4-اهم حاجة متضفيش اكتر من 200مل من السوائل للكحك علشان يطلع معاكي ناعم .
5- ريحة الكحك بلاش تستخدميها لو هتستخدمي سمنه بلدي ملهاش لازمة بس ممكن تكتفي ب10جرام من المحلب ويفضل تطحنيه في البيت
ولو هتعملي بسمن نباتي استخدمي ريحه الكحك والافضل تعمليها في البيت بنفسك .
6- الكحك مش بيطلع دايب مع انك التزمتى بالمقادير بالضبط علشان مش بستيه كويس لازم تبسى الكحك بايدك بعد ما تضيفى له السمن ابدئ بسى الكحك بايدك ربع ساعة أو استخدمي الكف ودا هيكون افضل .
7-الكحك حلو بس الحشو ناشف
سواء عجوة او ملبن عجمية !!!
لانك سيبتيه مدة كبيرة فى الفرن فالسوايل اللى فيه اتبخرت والملبن والعجمية نشفت المفروض اصلا العجوه بنعجنها بميه وشويه سمنه علشان تضبط معاكي في الحشو
اماالملبن اي ملبن غامق بلاش تشتريه لانه بيكون واخد تسوية زياده من المصنع و يبوظلك الوصفه المفروض الملبن يكون ابيض مش غامق بيكون ملبن خاص بالكحك مختلف عن المخصص للاكل
8_لو الكحك شقق يبقي متخدمش كويس ولو محشي وفتح في الفرن يبقي النار هادية زيادة عن اللزوم أو كمية الحشو ك
9-فى التسوية تاخدى بالك من حاجة لو الكحك سادة يبقى هنقلل الحرارة شوية علشان يستوى براحته يعنى ممكن 160
لو محشى هيكون على 180 ليه بقى؟ علشان السادة عاوزينه يستوى من جوه وبره كويس اماالمحشى فبيكون سمك العجينة رفيع بياخد 25 دقيقة تسويه فقط
10=لو الكحك بعدالتسوية النقشه اللي عليه بتروح ؟
يبقى دا حاجة من اتنين يااما الخميرة اوالبودر كتير يا اما خمر زيادة عن اللزوم. يعنى بتسيبيه يخمر كتير بعد التشكيل
الكحك بالخميرة يتشكل ويتساب يرتاح 10دقايق فقط قبل التسوية
