الشخصية الافضل فى مسلسل جعفر العمدة شخصية وداد

مرفت العربى 

شخصية حقيقية بتمثل ستات كتير في حياتنا، وهي الست أم عين فارغة، الصفرا، واللي بينتهي الحال بيها إنها تكون ست شمال.

والنوعية من الستات دي، موجودين في بيوت كتير، ومتجوزين، ومبيبقاش حد عارف عنهم حاجة، بالعكس، تشوفهم في الشارع، ملائكة، ربات بيوت، محترمات، محجبات ومنتقبات، وزي الفل، أي راجل يتمناهم.

بس لو دورت وراها، هتلاقيها شيطانة، وأداءها في الحياة، أداء شيطان على هيئة واحدة ست.

من شخصية وداد، كل راجل لازم يفهم حاجة مهمة: مراتك لو مكدراك، أو طول الوقت مش طيقاك، أو مثلا في الرايحة والجاية بتحاول تقل منك بكلمة، مقصودة أو غير مقصودة، أو مثلا مش بتديك ريق حلو إلا لما تنفذلها طلباتها، اعرف فورا إنها مش بتحبك.

الحب زي أي فضيحة لا يمكن إخفاؤه، بس للأسف الإنسان بيبقى مضروب على عينه وقلبه ومبيبقاش شايف الحقيقة، الست لو مش بتحب راجلها بيبان عليها في تصرفات كتيرة حتى لو حاولت إظهار العكس.

نهاية وداد الصفرا، هتكون نهاية قاسية، يمكن كل واحدة زيها بتتفرج، تتعظ وتعرف إن نهاية كل عين فارغة، كارثة وندم وعار.