تفاصيل إعتداء لوسي على ٣ في مسرحية “الحفيد”
فرح يوسف
كشف الفنان تامر فرج عن تفاصيل الخلافات بين الفنانة لوسي وفريق عمل مسرحية “الحفيد” التي كانت تعرض على المسرح القومي وتم إيقافها.
قال “تامر فرج” خلال مداخلة هاتفية مع برنامج “الحكاية” المذاع على شاشة mbc مصر ويقدمه الإعلامي عمرو أديب، إن لوسي اعتدت على عدد من الفنانين بالضرب ومنهم المخرج.
أضاف: “أول واقعة مع الفنان محمد يسري، ده ولد صغير من الشباب بيمثل دور ابني، المفروض أن لوسي تمسكه تضربه كده في المشهد، الولد كان بيطلع من تحت أيديها بطنه متعورة بإصابات، قولنا لها أهدي عليه شوية”.
تابع: “الأستاذ يوسف المنصور بطل العرض ومخرج المسرحية ومؤلفها، لما قالها مرة قبل العرض، يا أستاذة حضرتك بتخرجي عن النص وبتقولي كلام مش مظبوط والشخصية مش بالشكل ده، راحت ماسكاه في مشهد من المسرحية المفروض أنها بتضربه بالقلم علشان بيقولها أنتي ست خاينة، ضربته 5 أقلام وقالت له هو ده اللي في النص يا حقير، وهو والفنان عابد عناني تداركوا الموقف، وحولوا الموضوع أنه يبان جزء من المسرحية ودخل بعد كده يوسف يعيط في الكواليس”.
