دينا اويس..تكتب..البراندات وسنينها

الفلوس تحت رجلينا تعلينافوق راسنا توطينا

والجوهر اهم من المظهر

داحب الظهور يقطم الشهور امثال وامثال اتربينا عليها وسمعناهامن أجدادنا واهالينا

لكن للاسف الواقع بقي حاجة تانية خالص

السينييهات والبر اندات العالمية اللي غزت حياتنا في كل شئ من اول ملابسنا لحد ادواتنا في مطابخنا

كتير من الأشخاص وعلي اختلاف طبقاتهم الاجتماعية أصبحوا يهتموا ويحرصوا علي ارتداء احدث الماركات العالمية بغض النظر عن سعرها لاعتقادهم أنها بتمثل عنوان لشخصيتهم ومكانتهم الاجتماعية وبتحدد كمان قيمتهم أمام الاخرين

و أصبحت للاسف مقياس حكمنا علي بعض

وكان قيمتنا بتتحدد بالماركة اللي احنا لبسنها

والحقيقة أن الملابس عموما هي فن وذوق في اختيار الالوان.والموديلات اللي تناسبنا وتناسب الوقت والمكان اللي هنخرج فيه.

هوس اقتناء الماركات العالمية لم يعد فقط مقتصر علي الأغنياء دا حتي محدودي الدخل واللي طبعا أغلبهم بيكونوا من الشباب والمراهقين أصبح عندهم هوس شراء اغلي الماركات العالمية واللي بتفوق قدرتهم المادية جدا.

علم النفس هنا بيوضح لنا أن هوس اقتناء السينييهات والبراندات العالمية بغرض لفت الإنتباه والظهور بيصنف ضمن العقد النفسية وبيكون ليها علاقة بجذور الشخص وتربيته وان هناك فرق كبير بين حب التميز والظهور.

فالشخص المحب للتميز هو اللي عايز يوصل لاعلي مكانة في دراسةاو مركز معين

أما الشخص المحب للظهور هو اللي بيهتم بمظهره الخارجي وراي الناس فيه اكتر من اهتمامه بسلامة نفسه داخليا

ولو رجعنا بتاريخ تصميم الازياءالراقية منذ القدم هنلاقي أن روز بيرتن كانت اول مصممة أزياء مشهورة دوليا اوائل القرن ١٨ وأطلق عليها اسم وزيرة الموضة وكانت مصممة أزياء الملكة ماري انطوانيت ملكة فرنسا. ومع بدايات القرن التاسع عشر ظهر تشارلز فريدريك الانجليزي المقيم في فرنسا ١٨٥٨ وكان تاجر ملابس سابق و اول من وضع

تيكيت علي الملابس اللي بيصنعها لكي يميزها وكانت الملابس قبل منتصف القرن التاسع عشر بتصمم وتصنع منزليا

من جانب الخياطون الذين يعملون في البلاط الملكي

ومع اوائل القرن العشرين بدأت مجلات الازياءتهتم بنشر صور الازياء اللي أثرت بشكل كبير علي الذوق العام .

ومن هنا ظهرت وانتشرت بيوت الازياء والبراندات العالمية .واللي أصبحت هوس عند معظم الأشخاص وعلي اختلاف طبقاتهم الاجتماعية

حقيقي أن مش كل اللي بيحب يلبس البراندات والسينييهات عندهم حب التفاخر والظهور والتميز علي قد ما بيكونوا مقتنعين أن الغالي تمنه فيه لأن المنتج بيكون عمره اطول وجودته اعلي

لكن يبقي سؤالنا…هو السينيه اللي بيعملك قيمة ولا انت اللي بتعمل قيمة للبسك…؟؟