النادى أم المنتخب
دكتور /ياسر جلال زاهر
ا/محمد عبدالقادر
️بخصوص استبعاد لاعبى الأهلى من المنتخب فى وجهات نظر مختلفة يعنى الجمهور له رأى والنقاد والمحللين ليهم رأى واللاعبين المستبعدين بيشوفوا الموضوع من منظور تانى خالص
رأى الجمهور : وهو فى الغالب بيكون رأى عاطفى والجمهور بيشوف الموضوع بيصب فى صالح النادى خصوصا أن لاعبى الأهلى غير محظوظين فى اللعب للمنتخب لأن معظمهم أن مكنش كلهم بيتم إصابتهم سواء فى تدريبات المنتخب أو فى المباريات وعندنا أمثلة كتير زى الشناوى والسوليه وحمدى وعبدالمنعم وأكرم توفيق ومؤخرا محمود متولى فالجمهور شايف أن عدم انضمامهم شىء ايجابى ومفيد للنادى الأهلى .
رأى النقاد والمحللين : بيكون نابع من وجهة نظر فنية ما بين مؤيد ومعارض وفى اللى بياخد الاتجاه الدبلوماسى فى الكلام أن ده رأى المدير الفنى ومحدش له الحق فى التدخل وفى اللى بيقول وجهة نظرة حتى لو مختلف مع المدير الفنى فى الاختيارات .
رأى اللاعبين : مبدئيا أى لاعب فى مصر بيكون حلم حياته أنه ينضم لنادى كبير نادى جماهيرى زى النادى الأهلى لانه عارف إن النادى ده هو بوابته للانضمام للمنتخب وطبعا الانضمام للمنتخب غير أنه شرف لأى لاعب تمثيل منتخب بلاده أنه بيتيح الفرصه للاعب أنه يكون عنده عدد مباريات دوليه تساعده فى الاحتراف الأوروبى .
فاستبعاد أى لاعب من الانضمام للمنتخب بيؤثر نفسيا على اللاعب خصوصا لو كان لاعب يستحق بالفعل الانضمام وخصوصا لو شاف ان فى لاعبين أقل منه فى المستوى بيتم اختيارهم .
لذلك تفكير اللاعب مختلف تماما عن تفكير المشجع فاللاعب بيفكر فى صالح نفسه وكاريره وتاريخه الدولى والمشجع بيفكر فى صالح فريقه .
️لكن اللى استوقفنى حاجه مهمة جدا أن اتحاد الكرة بشكل خاص والمنظومة الرياضية فى مصر بشكل عام وصلتنا كجمهور للمرحلة ده وهى أننا نعطى أنديتنا الأولوية على منتخبنا وده شىء غريب علينا ومكنش موجود لا ايام الجوهرى ولا ايام حسن شحاته و لا الأجيال اللى قبلهم و طول عمرنا كجماهير فى ضهر منتخبنا قلبا وقالبا .
️الانقسام اللى اصبحنا عليه كجماهير اساسه الفساد والظلم والمجاملات الصارخة اللى بنشوفها وعايشين فيها
الانقسام ده أساسه مشكله في المنظومه الرياضية بأكملها وبسبب النوايا اللى مش سالكه ده المنتخب مشفش خير بعد جيل حسن شحاته .
️النهارده أى بطولة منتخبنا بيدخلها بنكون عارفين مسبقا أننا هنخرج منها بس الاختلاف هنخرج من الدور الكام .
️فمن الاخر أصلحوا ذات بينكم أصلحوا المنظومه الرياضية فى مصر طهروها من الفتنه ومن صانعيها ومن قلة الأدب ومن فاعليها ومن المجاملات ومن مرتكبيها عشان يعود الانتماء للمنتخب .
