نصايح_للمطبخ
مرفت العربى
-اتعودى لما تخلطى طماطم فى الخلاط تخلطى كميه كبيره وشليها فى دورق فى الثلاجه بدل ما كل يوم تشغلى الخلاط
-لما تحمرى مكرونه_لسان_عصفور او #مكرونه_شعريه حمرى الكيس كله وحطيه فى علبه فى الثلاجه تستخدميها كل لما تحتاجي
-اتعودى تشوحى كميه #بصل تكفى لطبخ الاسبوع كله وحطيها فى برطمان فى الثلاجه بدل ما كل يوم ايدك يبقى ريحتها بصل وثوم
-أفرمى كميه ثوم كبيره وحطيها فى علبه او كيس فى الفريزر تستخدميها علطول
– نحط نقطة زيت على وش برطمان_الصلصة عمرها ما تعمل عفن
– عصير الجوافه أو الموز عليه نص ليمونه ميخلهوش يسود
– واحنا بنخزن الفراخ نقطع معاها شرايح ليمون ونحطها بعد ما تتصفي كويس فى كيس التخزين
– مانفتحش على الفول كتير أثناء التدميس الهواء هو اللى بيخلى القشرة بتاعته تسود وياريت يتسوى فى إناء فتحته ضيقة زى الدماسة عشان نقلل مساحة احتكاك سطحه بالهواء
– شوية خل فى مياه غسيل المواعين بتفرق كتير بتمنع التصاق الصابون وبتنضف وتطهر وتلمع المواعين
– فصين ثوم ع البسلة بتغير الطعم تماما للاحلي
– للاحتفاظ بالخضره وقت اكتر حطي معلقه أو شوكة معاها فى كيس التخزين ونقفل الكيس كويس بعد م نفضي منه الهوا
– لحفظ الليمون نلف كل ليمونه فى ورق فويل او ورق جرايد ونحطهم فى علبه كده بيعيش مده اطول
– بعد ما نتبل البانيه نحطه فى البقسماط وعلى الفريزر نص ساعه هيتماسك معانا ومش هيفك ابدا واحنا بنحمره
– لو عندك كاتيل_استانلس اغلي فيه مياه وملح ليمون حينضف ويبقي بيلمع
– اللحمه مش بيتحطلها ملح الا ف آخر نص ساعه وشوية سكر صغيرين ونص معلقة صغيرة بيكربوناتو لو اللحمه كبيرة بيساعدوا على التسويه بسرعه
– مانحطش زيت واحنا بنسلق المكرونة هنستخدمها فى بشاميل أو وايت صوص عشان بيزحلق الكريمة من على المكرونة وبتبقى كأنها مسلوقة
– البصل_الأبيض للطبخ والأحمر للسلطات والساندوتشات
– نشوح الفراخ بملح وفلفل قبل ما نضيف مياه الشوربه بتفرق جدا فى الطعم
– نضيف على عصير_الليمون ربع كوبايه لبن بيبقي تحفه
– الطماطم بعد ما تتعمل بالخلاط بتتصفي من القشر والتفل عشان مايبقاش فيها طعم مرار
– للتخلص من اي #دهون على #البوتجاز كربانوتو وملح ليمون وخل بتشيل اي دهووون
– لو مش عاوزين الكفته تكش مننا نضيف معلقه بقسماط ونص معلقه بيكنج بودر عليها
وبس كدا
