«من أصعب المواقف».. محمد صلاح يكشف كواليس نومه أمام بوابة نادي المقاولون

بسمله هاني هاشم

كشف محمد صلاح لاعب المنتخب المصري ونجم ليفربول، عن أصعب المواقف التي مرت في حياته وهو صغير.

وقال صلاح خلال لقائه مع الفنانة إسعاد يونس في برنامج “صاحبة السعادة” المذاع على فضائية “dmc”: “المواقف الصعبة كثيرة، لكن لما بفتكرها دلوقتي بنبسط، منها افتكر مرة نمت على الأرض أمام بوابة نادي المقاولون في عز البرد”.

وأوضح صلاح كواليس نومه على الأرض أمام البوابة، قائلًا: “صاحبي قال تعالى نبات في القاهرة، والدي اداني 60 جنيه، الحاج كان بيوفر باين، صاحبي قال نروح لخالي في العاشر، ملقناش خاله، فقال عارف واحد حبيبنا هنبات عنه، لقيته بيبات في الترب، قلت له مش هأقدر، فقال طب استنى أفكر، قال خلاص عارف واحد في النادي، فرشنا في الأرض، وبيتنا ورا بوابة النادي، عملت الكوتش مخدة، صحيت 7 الصبح قبل ما حد يجي، مشينا فطرنا ورجعنا على 9، اليوم اللي بعده، بيتنا في ملعب 2، فرشنا في الأرض ونمنا كان فيه بطاطين، لكن الجو كان تلج”.

وتابع صلاح: “كنت مكسوف وقتها أكلم أبويا، لأن بعد ما قلت له هات 60 جنيه، قال لي عايز فلوس تانية قلت له لا، قال لي هيقضيك قلت له أه، وأنا مش من النوع اللي بيطلب، وكنت مكسوف أرجع له فلازم أقضيها”.