عبد المنعم رياض: تجربة متحف الدحيح مع أحمد الغندور العمل الأقرب إلى قلبي وأتمني العمل مع النجم الكبير عادل إمام 

 

 

محمد طه

 

 

الفنان الكبير عبد المنعم رياض فنان مصري قدم عدد من الأعمال الفنية المتنوعة في الدراما التليفزيونية والسينما وأيضا علي خشبة المسرح فمن الأعمال التلفزيونية مسلسل كلمة حق .المنتقم. قصر النيل ومن الأعمال المسرحية مسرحية أفراح القبة وخطة كيوبيد والتي حصل من خلالها أفضل ممثل لعام [2020]

 

 

 

 

وجاء نص الحوار كالتالي:

 

 

حضرتك بتقدم دلوقتي مسرحية خطة كيوبيد ماذا تعني كلمة ومصطلح كيوبيد؟

 

كيوبيد معناه عندنا في الأسطورة يرمز للحب وهو رمز إغريقي يوناني قديم وهو طفل صغير إله الحب له جناحان وعنده قوس وسهم يعمل علي نشر الحب وتقريب الأحبة من بعض من هنا بدأنا نفكر في فكرة جديدة ومختلفة لطرح موضوع الحب بشكل مختلف لأن الحب البداية ثم تأتي بعد ذلك تحمل مسئولية

 

 

لأن عندنا نسب الطلاق بتزيد كل يوم ناس بتحب بعض بعد ذلك يحصل أنفصال بداعي أن مفيش نصيب لكن لو وجد الحب بشكل حقيقي وفي تفاهم بين الشخصين الحب هيزيد ويكبر ومفيش طلاق بعد كدة ودة هدف المسرحية أو العمل

 

 

كيف تم ترشيح حضرتك للدور ؟

 

تم ترشيحي من قبل المخرج أحمد فؤاد مخرج عنده مدرسة خاصة بيه في الشغل شخص هادئ في عمله بيتناول الأفكار بشكل لايت كوميدي خفيف وفلسفة خفيفة في بتظهر بشكل خفيف علي المتفرج

 

 

ماهي إستعدادت حضرتك لتقمص الشخصية والدور في أي عمل فني؟

 

إستعدادتي لتقمص الشخصية بشكل كويس في العمل المسرحي بياخد وقت لأن العمل هنا مركب بنعمل اكتر من شخصية فكلنا محتاجين وقت كبير عشان نفهم الأبعاد اللي حابب المخرج يوصلها ونحضر لكل شخصية وكأنها منفصلة لوحدها فخدنا وقت كويس شهرين ونص أو ثلاث شهور

 

 

أية رأي حضرتك في كواليس العمل المسرحي مع الزملاء الآخرين؟

 

 

كواليس العمل المسرحي ممتعة جدا خاصة أن معنا مخرج هادئ الطباع ومنظم فاهم عايز إيه المجموعة فيها ناس تعرف بعض وناس لأ انا وكريم الحسيني نعرف بعض من حوالي [17]سنة لكن نوال سمير وأمنية حسن بنسبالي جداد عليا ولكن توليفة المخرج أحمد فؤاد كويسة جدا وبيعرف يختار الفنانين الشطار عشان يبقي في حالة من الحب بين الفريق وينعكس بالضرورة علي الشغل فيظهر للناس مدي الحب بين الفريق بشكل عام

 

 

الفرق بين المسرح والدراما التلفزيونية والسينما؟

 

 

تمثيل المسرح بيبقي في تأكيد التأكيد علي التمثيل والشخصية المقدمة في الدور والمسرح هو الشغل الأمتع للفنان وللجمهور لان الجمهور بيحب يشوف العمل المقدم له في الحال في عنده حالة من الحب أنه يشوف الممثل بهزاره بضحكه علي خشبة المسرح رد الفعل بيكون سريع وفي الحال سواء كان كويس او لا .السينما والدراما التكنيك جميل ومش سهل لكن ممكن نعيد المشهد ممكن نعمل توقف بعض الوقت ورد الفعل الجمهور بيكون بعد عرض العمل وليس في أثناء العرض زي المسرح

 

شعور حضرتك بعد حصولك علي جائرةافضل ممثل مسرحي في مهرجان مسرح القومي [2020]؟

 

جائزة مهمة وهي منحة من عند ربنا بعد تعب وجهد يقدمه الفنان للجمهور ودي بتبقي رسالة بأنك علي الطريق السليم وركز في اللي جاي عشان تبقي أفضل فكنت فرحان بالجائزة جدا

 

 

أعمال فنية كانت ناقلة في حياتك الفنية بشكل كبير وكانت محطات فنية مهمه؟

 

لو قولت أن في عمل فني كان مهم عن عمل فني آخر كدة ابقي بظلم العمل التاني لأن كل المحطات الفنية اللي قدمتها مهمة

 

 

أدوار فنية قدمتها علمت مع الجمهور؟

 

في الحمد لله أدوار فنية معلمة مع الناس سواء أدوار فنية في الدراما التليفزيونية التراجيديا أو أدوار الشر زي مسلسل كلمة حق إخراج الراحل العظيم الأستاذ سامي محمد علي. بطولة ميرفت امين حسن حسني وأحمد السعدني مع حفظ الألقاب لهؤلاء النجوم كنت بعمل دور شاب عنده نظرية تشاؤمية في الحياة شال قضية مكان شخص تاني بسبب الفلوس كان اسم سبعاوي والدور كان معلم مع الناس شوية

 

 

بعدها عملت شخصية في عمل اسمه المنتقم الطباخ الألدخ وكان لايت كوميدي وراجل وست ست الظابط اللي بيظهر في العمل ديما وأيضا الظابط اللي ف مسلسل أبو العروسه الضيف الذي لا يتعدي مشاهده عشر مشاهد في كل جزء وشخصية فطيم في مسلسل قصر النيل للمخرج خالد مرعي بطولة دينا الشربيني فطيم كان عامل دور أو شخصية فلاح فيومي جميل جدا وكان معلم مع الناس

 

 

أمين الشرطة اللي مكنش كويس كان مستغل للسلطة مسلسل فرعون آخر أعمال الفنان خالد صالح واخراج استاذ محمد علي

لكن علم مع الناس حاجة قريبة جدا وكانت تجربة قريبة من قلبي جدا كان أحمد الغندور الشهير بالدحيح كان بيعمل حاجة إسمها متحف الدحيح علي قناة أم بي سي جابوني اعمل ضيف حلقة وكان العمل كله خمس حلقات في عملت معاه حلقة بدور أينشتاين

 

 

بجد استمتعت جدا ومكنتش متخيل انه هتنجح مع الناس اوي كدة انا عارف أنه عنده مشاهدين كتير.جدا وهو بيعمل محتوي دمه خفيف و علمي محترم بيحترم بيه عقل الناس لكن ينقلب ويبقي عمل درامي دة كان بنسبالي مقلق شوية

لكن الحمد لله حقق نجاح كبير جدا مكنتش متخيله ولا متوقعه

 

 

 

هل في أعمال فنية قادمة لحضرتك ؟

 

في ان شاء الله أعمال فنية قادمة هو عمل كبير وضخم لكن لا نستطيع ذكر اي معلومة خاصة بالعمل

 

 

هل في نجم في الوقت الحالي تتمني تشتغل معه أو يجمع حضرتك بعمل معه؟

 

 

في نجوم كتير جدا منهم الفنان الكبير كريم عبد العزيز وأحمد عز والفنان الكبير طبعا عادل إمام